DILI, 24 Abríl 2025 (TATOLI)—Xefe Interina Apoiu Ospitalár no Enkamiñamentu iha Diresaun Nasionál Apoiu Servisu Ospitalár (DNSH-sigla portugés) Ministériu Saúde, Zelia B. Vilela, haktuir durante fulan tolu pasiente maioria moras kankru no moras fuan transferidu ba ospitál Malázia no Singapura.
“Totál pasiente durante fulan tolu (Janeiru-Marsu 2025) hamutuk 21 mak ita haruka bá iha ospitál Malázia no mós Singapura,” Zelia hateten iha nia kna’ar fatin, Kaikoli, kinta ne’e.
Nia tenik, husi pasiente 21 ne’e moras kankru hamutuk 14, moras fuan lima no moras sira seluk hanesan rins iha rua.
Nia afirma, husi pasiente sira-ne’e, mate iha rua, ida labarik halo tratamentu saúde iha ospitál Singapura no ida seluk mate iha Hospital Nacional Guido Valadares (HNGV) tanba moras grave.
“Iha Fevereiru, mate hamutuk na’in-rua. Ida mate iha rai-li’ur no ida hein prepara hela atu bá mak mate iha HNGV. Entaun, pasiente ida mate iha HNGV ne’e ho kankru pulmaun no ida tan labarik iha rai-li’ur ne’e ho idade ki’ik hetan moras fuan, tan ne’e médiku sira labele salva,” nia esplika.
Nia haktuir, husi pasiente 21 ne’e, na’in-11 mak fila ona no na’in-sia mak sei halo tratamentu iha-ne’ebá. Sira-ne’ebé mak sei halo tratamentu iha rai-li’ur hanesan iha IHEAL Medical Centre, Kuala Lumpur (Malázia) na’in-tolu no iha Prince Court Medical Malazia na’in-neen.
Tuir dadus, Diresaun Nasionál Apoiu Servisu Saúde, durante tinan 2024, Ministériu Saúde halo transferénsia pasiente hamutuk 347 ba ospitál estranjeiru hanesan Indonézia, Malázia no Singapura.
Husi númeru ne’e, pasiente referidu ba Malázia hamutuk 157, Singapura 54 no Indonézia 136.
Jornalista: Felicidade Ximenes
Editór: Xisto Freitas da Piedade
