DILI, 24 Abríl 2025 (TATOLI)—Institutu Apoiu ba Dezenvolvimentu Emprezariál (IADE), kinta ne’e, realiza semináriu nasionál Kompetisaun Planu Negósiu Inovativu (KPNI) ho objetivu atu dedika partisipante sira-nia aan sai emprezáriu iha futuru.
“Iha tinan ida-ne’e, IADE loke oportunidade kompetisaun planu negósiu inovativu ba joven sira iha Timor-Leste, ho objetivu atu dedika sira-nia aan sai emprezáriu iha futuru nian ho lema: Muda o nia moris ho negósiu inovativu,” Diretór Ezekutivu IADE, Filomeno Marcelino Belo dehan iha salaun Katedrál, Vila-Verde, Dili.
Nia esplika, semináriu ne’e atu fanun joven sira hodi iha inisiativa ka koñesimentu kona-ba saida mak negósiu ne’e loloos no atu dudu sira-nia vontade hodi sira bele halo negósiu ho di’ak.
Tinan ida-ne’e, Filomeno hatutan, partisipante sira-ne’ebé rejistu ba kompetisaun planu inovativu hamutuk 466 husi territóriu tomak. Husi númeru ne’e, feto hamutuk 175 no mane hamutuk 291.
“Negósiu ne’e iha nia setorál hanesan setór turizmu, agrikultura no komérsiu, entaun ita buka ida-ne’e para hamosu joven sira-nia hanoin hodi ita fasilita no apoiu sira hodi dezenvolve ita-nia rai,” nia dehan.
Tanba ne’e, nia husu ba partisipante sira aproveita oportunidade ne’ebé mak iha hodibele atinje mehi atu sai emprezáriu iha futuru.
“Iha tinan 2025 totál orsamentu ba manán-na’in sira hamutuk rihun $50,” nia hateten.
Iha fatin hanesan, partisipante Claudino Vila Nova dos Santos Pereira, orgullu tuir semináriu ne’e tanba aprende kona-ba oinsá halo negósiu inovativu hodibele implementa filafali iha sosiedade nia leet.
Jornalista: Felicidade Ximenes
Editór: Xisto Freitas da Piedade
