KOVALIMA, 23 Abríl 2025 (TATOLI) – Organizasaun Raes Hadomi Timor-oan (RHTO) Kovalima, gasta ona osan hamutuk $375 hodi fasilita Ema ho defisiénsia (EhD) atu trata sira-nia dokumentu sira.
Pontu vokál RHTO Kovalima, Rozito Amaral, informa katak RHTO gasta osan $375, tanba kada ema ho defisiénsia na’in-ida apoiu osan $75 hodi fasilita osan transporte nune’e bele trata sira-nia dokumentu.
“Hahú Janeiru to’o Abríl ne’e, Programa halo referál ba maluk EhD fasilita trata sira-nia dokumentu hanesan atestadu médiku iha ospitál, Billete identidade (BI) hamutuk na’in-lima”, Rozito Amaral dehan ba TATOLI, iha nia servisu fatin Postu Suai,Tabakolot, ohin.
Objetivu fasilita EhD trata dokumentu sira ne’e hanesan parte ida ajuda sira nune’e EhD bele hetan apoiu subsídiu husi Governu tanba ne’e mak RHTO iha programa apoiu transporte ba sira.
Mekanizmu apoiu orsamentu transporte ba EhD molok atu fó apoiu RHTO sei halo avaliasaun hodi identifika uluk kondisaun ema ho defisiénsia iha grau I, II, III ka IV. Fundu ne’e haree ba EhD ne’ebé ho grau III no IV.
Tuir dadus ne’e fasilita EhD na’in-sia husi númeru na’in lima mak fó apoiu osan transporte atu trata dokumentu na’in haat seluk uza rasik sira-nia osan privadu .
“Ami trata dokumentu asesu subsídiu husi Governu husi Janeiru to’o Abríl na’in-lima ami fasilita osan transporte no na’in-haat selu rasik osan transporte maibé sira prontu la’o hamutuk trata dokumentu hanesan atestadu médiku, kartaun Eleitorál, BI,” nia relata.
Jornalista:Celestina Teles
Editór: Rafael Ximenes de A. Belo
