BAUKAU, 25 Abríl 2025 (TATOLI)—Autoridade Administrasaun Munisipál (AAM) Baukau, sesta ne’e, hahú realiza private meeting no site visit antes anúnsia manán-na’in ba implementasaun projetu ualu Programa Dezenvolvimentu Integradu Munisipál (PDIM) tinan-2025.
Sekretáriu Munisipál Asuntu Administrasaun no Finansa, Juvinal Daniel Filipe Belo, esplika projetu PDIM ualu hirak-ne’e antes ne’e anunsiadu publikamente hodi kompañia sira submete dokumentu liuhosi pra-kualifikasaun no atuál iha faze private meeting antes kontinua ba site visit iha terrenu.
“Kompañia sira sei ba terrenu hodi haree fatin projetu hodi hatene situasaun hotu molok selesaun finál ba kompañia ne’ebé sai manán-na’in ba projetu PDIM iha tinan ne’e,” Sekretáriu Munisipál Asuntu Administrasaun no Finansa hateten iha salaun apuramentu Administrasaun Vila Nova, Baukau.
Juvinal Belo salienta vizita terrenu nu’udár parte husi kritériu iha aprovizionamentu nune’e kada kompañia bele hatene kondisaun téknika sira iha terrenu bainhira implementa projetu.
Husi projetu ualu ne’ebé sei hala’o, maioria submete dokumentu husi kompañia lokál ne’ebé kada projetu kuaze kompañia haat to’o ualu mak sei kompete no projetu ida mak sei presiza anúnsia foun tanba kompañia ida mak submete dokumentu.
Projetu PDIM tinan ne’e ho totál orsamentu hamutuk millaun $1.2 ne’ebé sei aloka ba projetu sira hanesan konstrusaun Postu Saúde Libagua, Postu Saúde Lelalai, konstrusaun rezidénsia pesoál saúde Osokeli, konstrusaun rezidénsia pesoál saúde Afasá, reabilitasaun edifísiu Eskola Bázika Filiál (EBF) Sorugua no konstrusaun edifísiu EBF Uai-kolo.
Jornalista: Natalino Belo
Editór: Xisto Freitas da Piedade
