DILI, 25 Abríl 2025 (TATOLI)–Antigu Primeiru-Ministru, Marí Alkatiri, husu ba Universidade Nasionál Timor-Loros’e (UNTL) atu kria sentru ida ba siénsia hodi dezenvolve ema ka massa krítiku atu halo krítika ne’ebé konstrutivu ba ukun-na’in sira-ne’ebé ukun la tuir dalan loos.
“Ha’u husu ba Universidade Nasionál Timor-Lorosa’e atu tenke kria sentru ida ba siénsia hodi dezenvolve massa krítiku. Atu halo saida, hodi krítika ami besi tua sira ne’e, bainhira halo la-loos tenke krítika atu hadi’a,” Alkatiri hateten bainhira sai oradór iha seminariu ne’ebé realiza iha UNTL Caicoli, Dili, sesta ne’e.
Lider nasionál ne’e dehan, tenke dezenvolve duni massa krítiku iha Universidade maibé tenke krítiku ne’ebé ho konstrutivu la’ós atu tolok ema tun-sa’e de’it.
“Massa krítika ne’e importante, maibé krítika ne’e la’ós atu tolok ba tolok mai, maibé ho pensamentu no rasionál, ida-ne’e akadémiku, intelektuál sira mak tenke halo,” Alkatiri dehan.
Nia hatutan, dezenvolve massa krítiku la’ós atu halo opozisaun, maibé atu kontribui hadi’a buat ne’ebé sala no fó kontribuisaun hodi buka dalan ida loos ba oin.
“Ita labele hanoin mak xoke malu beibeik, bosok malu tun-sa’e, maibé buat ne’ebé sala dehan sala, buat ne’ebé loos ne’e dehan loos. Ha’u la preokupa saida mak akontese maibé ha’u-nia preokupa mak jeresaun foun sira mai ne’e nia futuru,” Antigu Primeiru-Ministru ne’e tenik.
Jornalista : Hortencio Sanchez
Editór : Cancio Ximenes
