OEKUSI, 25 Abríl 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) aloka rihun $100-resin iha Fundu Infraestrutura atu halo reabilitasaun ba monumentu Masakre Tumin, ne’ebé lokaliza iha suku Bobometo, sub-rejiaun Oésilo
Prezidente Autoridade RAEOA, Rogério Lobato, hato’o iha ámbitu diálogu ho komunidade suku tolu iha sub-rejiaun Oésilo ne’ebé realiza iha sede suku Bobometo, sesta ne’e.
“Ha’u simu ona dezeñu husi Diresaun Rejionál Infraestrutura ho nia orsamentu sei gasta rihun $100-resin, ita aloka ba ne’e atu hadi’a ita-nia monumentu masakre ne’e, tanba sira mate ba rai ne’e, fakar sira-nia raan hodi sosa ita-nia ukun rasik-aan ne’e. Osan ne’e karik la sufisiente mak ita sei aumenta,” Rogério Lobato dehan.
Notísia relevante: Presiza harii ponte hodi fasilita movimentasaun bá semitériu masakre Bobo-Ufe Tumin
Nia informa katak projetu ne’e integra iha planu Konsellu Administrasaun Fundu Infraestrutura (KAFI) ho tipu projetu emerjénsia liuhusi ajudikasaun direta, ne’ebé nia planta no kadernu enkargu (BoQ, sigla inglés) aprova ona no sei ezekuta iha tinan ne’e.
Notísia relevante:Masakre Tumin: “Subar kalan haat, ha’u-nia kanek ne’e ular hotu”
Iha fatin hanesan, Xefe Suku Bobometo, José Labi Caet, agradese tanba pedidu submete iha 2024, maibé tinan ne’e bele responde ona, tanba monumentu ne’e presiza halo reabilitasaun no konstrui ponte, nklui fatin atu realiza misa.
“Ha’u agradese, tanba uluk Prezidente rasik mai haree direta, ha’u mak rekomenda iha momentu ne’ebá. Tanba monumentu ne’e konstrui inisiativa husi komunidade Bobometo, maibé ohin ha’u rona informasaun atu hadi’a iha tinan ne’e, ne’ebé ami sente orgullu, tanba ida-ne’e presiza hadi’a fatin di’ak ba sira, tanba sira uluk mate mak ohin ita hamriik mesak nu’udar nasaun ida”, nia afirma.
Notísia relevante: Masakre Tumin: Milísia oho ema na’in-14 iha 08 setembru 1999 (I)
Jornalista: Abílio Elo Nini
Editóra: Maria Auxiliadora
