BAUKAU, 24 Abríl 2025 (TATOLI)—Autoridade Suku Defauasi, Postu Administrativu Baguia, Munisípiu Baukau, tinan ne’e sei realiza atividade regulár hodi kanaliza bee-moos ba komunidade liuhosi orsamentu síklu VII Programa Nasionál Dezenvolvimentu Suku (PNDS).
Xefe Suku Defauasi, Salustiano Ximenes Guterres, esplika Reuniaun Konsellu Suku aprova no deside atividade referida tanba konsideradu importante no tuir nesesidade komunidade ne’ebé durante ne’e sei falta bee-moos.
“Sei iha prosesu levantamentu orsamentu atu transfere bá konta banku suku nian, maibé ida-ne’e prosesa iha administrasaun munisípiu,” Xefe Suku Defauasi informa ba TATOLI iha Salaun Apuramentu Administrasaun Vila Nova, Baukau, kinta ne’e.
Salustiano Guterres haktuir katak ekipa téknika PNDS hamutuk ho ekipa jestaun suku hala’o ona levantamentu dadus iha terrenu ne’ebé tuir planu sei reabilita kanu no kanaliza husi bee-matan ba komunidade iha aldeia haat.
Husi levantamentu dadus, ekipa téknika identifika bee-matan rua ne’ebé fahe bee-matan ida sei benefísia aldeia rua kompostu Defauasi no Sahemeta, enkuantu bee-matan seluk sei benefísia komunidade iha aldeia Laribere no Warú.
“Ho atividade ida-ne’e sei hakbesik komunidade atu asesu bee-moos no responde ona preokupasaun durante ne’e,” Salustiano Guterres akresenta.
Entretantu, Suku Defauasi hamutuk aldeia haat kompostu aldeia Defauasi, Sahemeta, Laribere no Warú ho totál populasaun hamutuk 1.125 husi uma-kain 225.
Jornalista: Natalino Belo
Editór: Xisto Freitas da Piedade
