KOVALIMA, 25 Abríl 2025 (TATOLI) – Servisu munisipál agrikultura (SMA), Kovalima, liuhusi sentru manutensaun tratór iha Sanfuk, hodi fasilita fila rai gratuita ba agrikultór sira-nia to’os hodi hasa’e produsaun produtu iha rai-laran.
“Iha 2025 ita hetan apoiu kombustível faze ba dahuluk kombustível litru hamutuk 5000 hodi mai hala’o atividade fila rai gratuita ba agrikultór sira-nia to’os”, Diretór Servisu Munisipál Agrikultura Kovalima, Lino Magno, relata dadus ne’e ba jornalista sira, iha Tabakolot, ohin.
Mekanizmu Agrikultura Kovalima distribui kombulstivél ba agrikultór sira mak hanesan, ba agrikultór ne’ebé halo to’os iha rai-maran ense de’it mina hodi fila agrikultór sira-nia to’os no ba agrikultór barak halai natar ida-ne’e presiza apoiu kombustivél direta nune’e sira bele halai natar.
Kombustível ho litru 5000 de’it nune’e fó apoiu ne’ebé la hanesan balun apoiu de’it litru 10, balun menus husi litru 10, tanba kombustível la sufisente atu fó ba agrikultór hotu.
Bazeia ba dadus iha 2025 ne’e servisu agrikultura, fila ona agrikultór sira-nia rai hamutuk ektare 199,43 ne’ebé mai husi Postu administrativu Maukatar fila ektare 25,85, postu Suai ektare 151,03, Tilomar ektare 22,25 no Zumalai ektare 0,3.
Fó hanoin fali katak iha 2024 ne’e , agrikultura Kovalima fila agrikultór sira-nia rai ektare hamutuk344,56 ne’ebé mai hosi postu sira hanesan Postu administrativu Maukatar fila agrikultór nia rai ektare 28,04, postu Suai ektare 177,59, Tilomar ektare 63,81 no Zumalai ektare 75,12 .
Jornalista:Celestina Teles
Editór: Rafael Ximenes de A. Belo
