KOVALIMA, 25 Abríl 2025 ( TATOLI) – Konselleira embaixada Austrália iha Timor-Leste (TL) no Sekretáriu Estadu Formasaun Profisionál (SEFOPE) hato’o sentidu lutu ba Sua Santidade Papa Francisco ne’ebé fila hikas ona ba kadunan Santu, iha segunda ne’e, tanba doensa ne’ebé nia sofre.
Konselleira ba dezenvolvimentu governasaun no ekonomia husi embaixada Austrália, Fabia Shah, hato’o sentidu kondolénsia ba falesimentu sua Santidade Papa Francisco, tanba lori tristeza ba mundu tomak.
“Ha’u hato’o sentidu kondolénsia ba falesimentu ita-nia Sua Santidade Papa Francisco, hanesan reprezenta Governu Austrália no pesoál senti previlejiu, tanba iha tinan-10 liubá bele hasoru Papa Francisco ne’ebé nia foka loos bainhira servisu iha refujiadu Áfrika tama iha Itália parte Europa”, Fabia Shah hato’o bainhira partisipa serimónia inaugura sentru formasaun dalén inglés iha Aldeia Lakonak, foin lalais ne’e.
Tuir Favia konta katak, Papa Francisco hanesan ema ne’ebé ajuda fó bensaun ba refujiadu sira nune’e ho falesimentu papa Francisco hanesan lori tristeza boot ba mundu tomak.
Iha sorin seluk Sekretáriu Estadu Formasaun Profesionál no Empregu (SEFOPE) Rogerio Araujo Mendonça mós manifesta sentidu pézame ba Sua Santidade ne’ebé mak hakotu ona nia jornada moris iha mundu ida-ne’e.
Ho falesimentu Sua Santidade Papa Francisco, Estadu Timor Leste dada bandeira RDTL ho ‘meia-haste hodi hatudu lutu nasionál.
Jornalista:Celestina Teles
Editór: Rafael Ximenes de A. Belo
