DILI, 25 Abríl 2025 (TATOLI)—Institutu Nasionál Saúde Públika Timor-Leste (INSPTL) hamutuk ho Asosiasaun Maluk Timor (AMT) halo konsulta dezenvolvimentu módulu treinamentu ba jestaun lideransa sira iha kuidadu saúde primária.
Objetivu husi atividade ne’e atu tau hamutuk hanoin sira hodibele elabora no fortifika di’ak liután prosesu dezenvolvimentu ba módulu atu uza iha formasaun sira.
“Atividade ohin loron ne’e halo kolaborasaun husi Asosiasaun Maluk Timor hodi dezenvolve módulu treinamentu ba jestaun lideransa, nune’e bele fó kapasidade ba jestór sira iha saúde primária, para sira bele fó prestasaun ne’ebé mak di’ak liután,” Prezidente INSPTL, Merita Monteiro hateten ba jornalista sira, iha City 8, Manleuana, Dili, sesta ne’e.
Nia esplika, módulu ba jestaun lideransa ne’e hahú kedas rekursu finanseiru no rekursu umanu ne’ebé mak iha no mós patrimóniu sira-ne’ebé sira simu inklui jestaun ai-moruk no konsumável ne’ebé mak iha fasilidade sira-ne’ebé sira servisu ba.
Iha fatin hanesan, Diretora Ezekutiva Asosiasaun Maluk Timor, Dillyana Ximenes hateten Asosiasaun Maluk Timor komprometidu atu servisu hamutuk ho INSPTL ne’ebé suporta másima husi The Department of Foreign Affairs and Trade (DFAT) Austrália iha kontestu kriasaun módulu hodi guia saúde primária nian.
Aleinde ne’e, Primeiru sekretáriu Saúde no Nutrisaun husi DFAT Austrália, Deidre Ballinger hateten Governu Austrália sente orgulu nu’udár parseiru ho Ministériu Saúde nian no orgullu hodi fó apoiu ba INSPTL nia esforsu sira hodi eleva kapasidade profisionál saúde sira-nian iha área klínika no la’ós klíniku.
“Programa ida-ne’e, dijitalizasaun formasaun servisu saúde nian ba servisu-na’in saúde sira iha área klínika no la’ós klíniku sira hodi tulun INSPTL atu dezenvolve ka adapta módulu formasaun sira-ne’ebé eziste ona hodi permite hala’o formasaun face to face no mós online,” Deidre Ballinger konklui.
Jornalista: Felicidade Ximenes
Editór: Xisto Freitas da Piedade
