DILI, 25 Abríl 2025 (TATOLI) – Ministériu Edukasaun (ME) simu vizita ofisiál husi delegasaun husi Sekolah Tinggi Pastoral Keuskupan Agung Kupang (STIPAS), Indonézia, hodi diskute kona-ba posibilidade habelar kooperasaun iha setór edukasaun.
Ministra Edukasaun, Dulce de Jesus, hateten vizita ne’e hola parte iha prosesu esplorasaun serbisu hamutuk, liuliu iha área edukasaun pastorál ne’ebé STIPAS halo ona durante ne’e ho Eskola Tékniku Vokasionál Salele, Kovalima.
“Enkontru ohin ne’e ami seidauk rekomenda buat ida. Ohin ne’e, enkontru insiál, foin dahuluk sira mai enkontru ho Governu, halo diskuasaun karik iha posibilidade ruma halo kooperasaun tanba sira iha matéria ne’ebé kapa’as tebes kona-ba edukasaun família no edukasaun ein jerál”, Dulce de Jesus hateten, ohin.
Nia haktuir katak ho aprezentasaun matéria sira ohin ne’e parte minitériu seidauk deside buat ida tanba sei tetu filafali molok foti desizaun, maibé liuhusi esperiénsia ne’ebé serbisu ona ho eskola Salele ne’e maioria liuhusi igreja.
STIPAS nia prezensa ne’e la’ós foin maibé, dezde 2024 no daudaun estudante timoroan na’in-tolu husi Eskola Vokasionál Salele hala’o estudu iha STIPAS-Kupang.
“Sira mós halo kooperasaun ho Universidade Katólika Timorense [UCT, sigla portugés], Balide, no professor sira ne’ebá mai halo estájiu iha ne’e no ajuda mós Sentru Kulturál Indonézia nian iha Timor-Leste hodi halo preparasaun língua malaiu ba timoroan sira ne’ebé mak hetan bolsa estudu bá Indonézia”, dehan.
Iha fatin hanesan, Reitór STIPAS Kupang, Pe. Florens Maxi Un Bria, hateten vizita ne’e atu hatudu amizade katak dezde 2024, STIPAS Kupang implementa ona programa estájiu ka Kuliah Kerja Nyata (KKN) iha Suai no estájiu profisionál ka Praktek Kuliah Lapangan iha Timor Leste.
“Ami mós fó bolsa estudu ba timoroan no fasilita mós dokumentu lisensa rezidénsia ka Kartu Izin Tinggal Terbatas [KITAS] ba estudante sira husi Timor-Leste ne’ebé estuda iha ami-nia kampus”.
Aliende ne’e, STIPAS mós kolabora ho UCT no Institutu Superiór Filozofia no Teolojia (ISFIT) iha atividade peskiza no atendimentu komunitáriu. STIPAS mós ativu estabelese hela relasaun ho parókia sira iha Suai, Dili, no Oekusi, nu’udar fatin ne’ebé estudante sira tuir KKN.
“Ami hein katak vizita ne’e bele loke oportunidade ba kooperasaun ne’ebé konkreta liu, inklui posibilidade hodi fó bolsa estudu husi Governu Timor-Leste ba estudante sira ne’ebé hakarak kontinua sira-nia ensinu superiór iha Kupang”, nia hateten.
Enkontru ne’e taka ho kompromisu hamutuk atu kontinua diálogu no esplora forma kooperasaun ne’ebé bele fó benefísiu mútua ba parte rua, liuliu iha dezenvolvimentu edukasaun pastorál no rekursu umanu iha rejiaun.
Jornalista: Arminda Fonseca
Editora: Maria Auxiliadora
