DILI, 25 Abríl 2025 (TATOLI) – Ministériu Obra Públika (MOP) hahú halo melloramentu ba estrada kuak sira iha Dili ne’ebé ho dimensaun ki’ik liu menus husi metru 2 kuadradu.
Tékniku Diresaun Nasionál Manutensaun no Konservasaun Rodoviária MOP, Emidio Daniel Sarmento Alves, esplika katak melloramentu ba estrada kuak sira iha kapitál ne’e iha tipu rua mak uza alkatraun malirin ka (Asphalt cold mix) ne’ebé responsabiliza direta husi ministériu no alkartaun manas (Asphalt hot mix) responsabiliza husi empreza kontratada Montana Diak.
“Loron rua ona ami serbisu kalan de’it hahú taka ona estrada kuak sira iha dalan protokolu ne’ebé ho dimensaun ki’ik, liuliu iha parte semáforu nian ne’ebé foin lalais kompañia sira ke’e halo intalasaun fiu ba semáfotu modernu foun hanesan iha supermarket Leader oin, Aitarak-Laran no seluk tan. Ita foka uluk ida-ne’e mak kontinua bá fatin sira seluk”, Emidio Daniel Sarmento Alves hateten ba Tatoli via telefone, ohin.
Nia hatutan dalan kuak sira ne’ebé ho dimensaun kiik, daudaun sira-nia parte identifika besik 20 no ida-ne’e hahú husi trosu Leader, Elemloi, to’o Hudi Laran no seluk tan.
“Materiál cold mix ka alkatraun malirin daudaun ready ona hamutuk tonelada 15 ne’ebé ami tenta sei taka hotu dalan kuak sira tantu protokolu ka urbana ne’ebé kuak dimensaun ki’ik”, nia haktuir.
Ba dalan kuak sira ne’ebé nia dimensaun boot liu metru 2 kuadradu ne’e sei responsabiliza husi empreza Montana Diak, tanba razaun utiliza materiál diferente, tanba materiál asphalt manas só bele fábrika ho kuantidade ne’ebé boot no presiza kontrola nia temperatura, jeralmente labele menus husi degrauas 100.
Notísia relevante: https://tatoli.tl/2025/04/17/mop-sei-halo-melloramentu-ba-estrada-kuak-sira-iha-kapital/
Jornalista: Arminda Fonseca
Editora: Maria Auxiliadora
