DILI, 25 Abríl 2025 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho ekipa téknika husi Ministériu Obras Públika (MOP) organiza empreza Montana di’ak hodi ke’e no sobu posu toilet (safety tank) ne’ebé empreza Joni J-Kuluhun hakoi iha despezu estrada públiku nia okos.
Tuir observasaun jornalista nian iha terrenu, posu toilet ne’ebé sira hakoi iha estrada li’ur ne’e, iha ida mak tuan no ida foun tanba posu toilet ne’ebé pertense iha laran laiha ona espasu ba lixu ema nian nune’e sira ke’e tan posu ida iha uma oin ne’ebé halo hela despezu estrada.
“Ohin ita mai atu haree kontrolasaun atividade servisu ne’ebé kompaña Montana di’ak halo hela alargamentu estrada husi parte Kuluhun ba to’o Fatuahi ne’e, liuliu pertense iha empreza Joni J ninia uma oin”, Sekretáriu Estadu, Germano Santa Brites Dias, informa ba jornalista sira iha Kuluhun, Dili, ohin.
Governante ne’e haktuir, tanba tuir informasaun husi tékniku MOP, pertense uitoan ne’e, iha posu toilet (safety tank) ne’ebé antigamente iha no iha prosesu alargamentu kona-ba entaun posu ne’e iha iha loos espasu públiku.
“Ita fó hela tempu ba kompaña atu halo sira-nia dever hodi ke’e sai tiha safety tank ne’e, no muda fali ba laran, nune’e bele garante ba futuru estrada ne’e labele monu”, autoridade ne’e hateten.
Nia esplika, ida-ne’e evita para ba futuru labele fó impaktu ba Estrada públiku, hanesan bee intupidu, kria rai-mamar halo estrada monu, no fó iis ne’ebé ladun di’ak ba komunidade sira ba tinan sanulu resin-lima mai tan, atu labele fó sala malu ka duun malu fali.
“Ho nune’e mak ita halo kontrolu másimu ba ema hotu-hotu ne’ebé afeta ba alargamentu ne’e karik, no ninia posu ne’e iha estrada-ibun, entaun sira bele muda fali ba kotuk, nune’e estrada boot ne’e husik para Estadu bele halo dezenvolvimentu”, nia realsa.
Entretantu, jornalista sira tenta atu entrevista ho jestór Kompaña Joni J, maibé sira lakohi fó autorizasaun no la fó resposta kona-ba asuntu ida-ne’e, enkuantu eskavatór ezekuta ona servisu ne’e no posu ne’e ninia naruk ho metru-neen no ninia luan metru-tolu.
Jornalista: Alexandra da Costa
Editór: Rafael Ximenes de A. Belo
