KOVALIMA, 25 Abríl 2025 (TATOLI) – Administradór Postu Administrativu Maukatar, Laurentino de Jesus, husu ofisiál Sekretariadu Tékniku Administrasaun Eleitorál (STAE) atu halo atendementu ba sidadaun hasai sira-nia Kartaun eleitorál (KE) ho sistema biométriku iha postu administrativu sira.
“Ofisiál STAE sira presiza halo atendementu ba ita-nia sidadaun atu hasai sira-nia Kartaun eleitorál ho sistema biométriku iha postu adminostrativu sira tanba sidadaun sira iha postu maioria seidauk atualiza Kartaun eleitorál”, Autoridade postu Maukatar, Laurentino de Jesus informa ba TATOLI, iha AMC, ohin.
Líder postu ne’e dehan, sidadaun ne’ebé kompleta ona idade 17 anos no sidadaun sira iha postu Maukatar maioria mak seidauk atualiza KR ne’ebé ho sistema biométriku nune’e sira nafatin uza kartaun eleitorál anteriór.
“Kartaun eleitorál ho sistema biométriku ami funsionáriu husi postu administrativu rasik mak atualiza ona no populasaun balun maibé populasaun maioria mak seidauk atualiza kartaun eleitorál ho sistema biométriku”, nia informa.
Ho nune’e hanesan autoridade Postu administrativu Maukatar fó hanoin ba STAE atu hakat ba iha postu administrativu nune’e halo atendementu sidadaun sira hasai KE no labele konsentra de’it iha edifísiu STAE munisípiu.
Diretór STAE munisípiu Kovalima, Francisco Gusmão klarifika, atu halo atendementu iha postu administrativu sira, STAE presiza atu halo rekrutamentu ba tékniku sira nune’e hodi bele dezloka ba postu administrativu sira.
“Bazeia ba ami-nia planu ami halo atendementu iha Abríl ne’e nune’e ami sei hein tanba ita seidauk halo rekrutamentu parese tinan oin. Foin lalais enkontru iha nasionál planu atu halo rekrutamentu ba tékniku sira ne’e iha tinan oin”, nia esplika.
Tuir planu atu halo rekrutamentu kada postu ema na’in rua mak hanesan operadór na’in ida no asistente na’in ida, nune’e bele halo atendementu sidadaun hasai kartaun iha postu administrativu ne’ebé mak pertense ba Kovalima.
Bazeia ba dadus sidadaun ne’ebé mak trata ona KE ho sistema biométriku hamutuk rihun tolu-resin no dyadaun ne’e rihun rua-resin mak tékniku STAE seidauk halo impresaun kartaun eleitorál ho sistema biométriku ba sidadaun sira.
Fó hanoin fali katak iha loron 30 Outobru 2024 ne’e, Sekretáriu Estadu Dezenvolvimentu Lokál (SEDL), Mateus dos Santos Tallo lansa resensiamentu eleitorál atualiza baze dadus ho sistema biométriku iha Kovalima.
Jornalista:Celestina Teles
Editór: Rafael Ximenes de A. Belo
