KOVALIMA, 25 Abríl 2025 (TATOLI) – Servisu Munisipál Agrikultura Kovalima (SMAK), observa katak agrikultór sira iha munisípiu Kovalima seidauk iha koñesementu di’ak atu kuda lehe iha sira-nia to’os no natar.
Diretór Servisu Munisipál Agrikultura Kovalima, Lino Magno, esplika katak programa lehe implementa husi Ajénsia Internasionál FAO ne’ebé servisu hamutuk ho Ministériu Agrikultura Péska, Pekuária no Floresta (MAPPF).
“Ita-nia agrikultura sira ne’ebé halo to’os no natar bainhira kuda lehe nia vantazen di’ak tanba bele hamenus gastu osan atu hamoos duut iha to’os sira”, Dirijente Agrikultura Kovalima, Lino Magno dehan ba jornalista sira iha Tabakolok, ohin.
Kuda lehe ne’e importante tanba liuhusi kuda lehe halo rai-bokon nafatin nune’e komoditi ne’ebé mak agrikultór sira kuda bele fó rezultadu di’ak hodi hasa’e produsaun.
“Ho nune’e ita presiza habelar informasaun ba agrikultór sira nune’e fasilita agrikultór kuda lehe tanba kuda lehe du’ut iha to’os sei la iha no hamenus gastu osan atu ema hamoos to’os”, nia haktuir.
Bazeia ba observasaun hosi Agrikultura Kovalima komunidade sira seidauk iha koñesementu di’ak kuda lehe tanba ne’e presiza atu habelar informasaun ba komunidade sira atu kuda lehe iha sira-nia to’os.
“Ita seidauk uza másima lehe tanba seidauk koñese di’ak lehe, tanba ne’e foin lalais foin implementa iha Maukola. Ita haree nia rezultadu pozitivu nune’e ba futuru presiza bainhira kuda lehe la presiza ona atu fila rai no hamoos du’ut,” nia dehan.
Jornalista:Celestina Teles
Editór: Rafael Ximenes de A. Belo
