VIKEKE, 26 Abríl 2025 (TATOLI) – Prezidente Autoridade Munisipál (PAM) Vikeke, Francisco C.S de G. Soares, hateten, momentu Sua Santidade Papa Francisco vizita Timor Leste hela memória ida ba timor-oan hotu.
“Iha momentu vizita ita-nia Sua Santidade Papa Francisco mai Timor, ha’u sente momentu ida-ne’ebé karun no mementu ida-ne’ebé furak ba ema timor-oan sira hotu. Iha momentu ne’ebá ha’u sente orgullu, ha’u bele hakbesik-an ba Papa Francisco, hodi hetan bensaun direta husi maktoban papa Francisco,” Francisco C.S de G. Soares ba Tatoli, iha Viekeke, ohin.
Nune’e mós autoridde Vikeke relembra fali katak, iha loron 9-11 fulan-Setemrbu 2024 prezensa Papa Francisco to’o iha Timor-Leste, sai orgullu boot ba ema idak-idak no ba povu doben Vikeke.
“Iha Tasi-Tolu, Dili, ha’u no ha’u-nia espoza, ami na’in-rua hetan hotu lembransa tersu direta husi Papa Francisco. Nune’e tersu ne’ebé ami hetan, ami na’in-rua sempre uza tersu ne’ebé Papa Francisco oferese ba ami, sai lembransa nafatin iha ami-nia moris. Papa Francisco hanesan figura líder ida-ne’ebé ema hotu hakarak besik, maibé oportuniddade ne’ebé ami hetan oportunidade ida-ne’ebé karun no furak tebes. Vizita Papa Francisco nian mai Timor sei sai memória jerasaun ba jerasaun sira. Iha momentu ne’ebá, ha’u reprezenta kultura husi Vikeke, ha’u orgullu boot ba povu Vikeke tomak,” nia relembra.
Nia dehan, Papa Francisco ninia prezensa hanesan líder karismátiku, líder mundiál no líder ba promotór ba fraternidade umana ne’ebé hatudu ona ba Timor.
Ho Papa ninia vizita, Timor sai mós koñesidu iha mundu hanesan nasaun katóliku ne’ebé mak gosta dame no hadomi ba faternidade umana, maibé agora hela memoria ba timor-oan sira hotu.
Iha momentu ne’ebá, Governu Sentrál fó fiar ba kada munisípiu sira inklui Vikeke nune’e autoridade sira organiza peregrinu husi Vikeke partisipa misa iha Tasi-tolu.
Nune’e iha momentu ne’ebá, tuir dadus peregrinu husi munisípiu Vikeke ho totál na’in-6.024, kompostu husi feto na‘in-3.142 no mane na’in-2.882, partisipa misa iha tasi Tasi Tolu, Dili.
Entretantu, Sua Santidade Papa Francisco hakotu iis iha loron-Segunda, 21 Abríl tinan 2025.
Jornalista : Vitorino Lopes da Costa
Editór : Evaristo Soares Martins
