KOVALIMA 28 Abríl 2025 ( TATOLI) – Kamára Komérsiu Indístria Timor-Leste (CCI-TL), iha munisípiu Kovalima, rekomenda pontu tolu ba Governu liuhusi Ministériu Komérsiu no Indústria (MKI).
Prezidente CCI-TL, Munisípiu Kovalima, Grinaldo de Jesus, rekomenda katak Governu presiza atu haree rekursu umanu emprezáriu sira, apoiu finanseira no mós kontrola merkadu livre.
“Ha’u ko’alia kona-bá dinamiza ekonómia nian, oinsá ita haree uluk osan sai no tama, oinsá mak haree dezenvovimentu ekonomia iha rai, oinsá Governu apoiu setór privadu atu bele moris no forti nune’e ekonomia bele sustentavel iha rai-laran espesiál iha Kovalima”, Prezidente CCI-TL, Kovalima, Grinaldo de Jesus hato’o iha nia diskursu bainhira partisipa iha programa diálogu husi MKI, iha salaun AMC, ohin.
Notísia relevante:MKI hala’o diálogu ho emprezáriu Kovalima, destaka objetivu lima
Ho nune’e, setór privadu rekomenda ba Governu oinsá atu fó apoiu tanba haree ba rekursu umanu presiza fasilita formasaun ba emprezáriu sira atu hasa’e setór privadu sira-nia koñesementu kona-ba área negósiu.
“Ami husi setór privadu liuhusi CCI-TL Kovalima, ami sujere ba Governu oinsá bele apoiu ami tanba ami presiza liu hanesan, ita haree ba rekursu umanu emprezáriu iha Kovalima sei menus iha koñesementu iha área negósiu no presiza apoiu finanseira”, nia dehan.
Daudaun ne’e, tuir autoridade másima CCI-TL Kovalima ne’e katak Timor-Leste adota merkadu livre ho nune’e liuhusi fasilita formasaun nune’e emprezáriu sira; timor-oan, bele kompete ho emprezáriu husi estranjéiru sira. Importante Presiza fasilita formasaun iha área negósiu no bainhira apoiu orsamentu ho fundu espesiál no nia regra labele todan hafasil burokrásia nune’e bele tulun empreza timoroan bele moris.
“Governu presiza atu kontrola emprezáriu sira husi rai-li’ur, tanba ita fó livre liu nune’e halo empreza lokál difisil moris nune’e presiza atu buka solusaun. Empreza hanesan to’os ba nasaun, tanba empreza mak kuda no Governu mak ku’u”, nia fó hanoin.
Jornalista:Celestina Teles
Editór: Rafael Ximenes de A. Belo
