VIKEKE, 28 Abríl 2025 (TATOLI)—Organizasaun Nasaun Unida ba Alimentasaun no Agrikultura ka Food and Agriculture Organization (FAO, sigla englés), segunda ne’e, distribui tableta marka Galaxi unidade 26 ba estensionista Vikeke hodi utiliza ba rekolla dadus agrikula sira kada suku no postu sira.
Tableta ne’e entrega direta husi reprezenta FAO Sonya Syafitri, Prezidente Autoridade Munisipál (PAM) Vikeke, Francisco C.S de G. Soares no diretór servisu agrikultura munisípiu Vikeke, Olivio Soares Freitas, ba estensionista sira iha salaun servisu agrikultura.
Objetivu apoia distribuisaun hodi haforsa sistema avizu antesipa hodi hasa’e rezilénsia hasoru perigu idro-meteorolu iha Timor Leste.
“Ha’u reprezenta organizasaun FAO sente kontente tanba estensaun agrikultura Vikeke bele partisipa iha atividade ida-ne’e. Ha’u mós husu agradese ba Prezidente Autoridade Munisípiu Vikeke bele hola parte iha momentu distribuisaun tableta no formasaun. Ho atividade sira-ne’e ita haforsa servisu hamutuk entre Governu, FAO no povu Timor Leste. Atu nune’e, ita iha kompromisu ida, hodi halo jestaun ba dezastre naturál, atensaun mudansa klímatika ba iha setór agrikultura ne’ebé sai fatór ida ba komunidade Vikeke,” Sonya Syafitri hateten iha salaun servisu Agrikutura, Beloi, ohin.
Nia dehan, formasaun klimátika ne’ebé FAO oferese ba estensaun agrikultura ida-ne’e formasaun kontinuasaun hodi apoia ba hasa’e kapsitasan, sai hanesan oportunidade hodi aprende hasoru dezafiu sira iha futuru.
“Tanba, ba oin ne’e, sei hasoru mudansa klimátika oioin, tan ne’e FAO esforsu hodi fó kapasitasaun liuliu hasoru mudansa klimátika. Atu nune’e, ita bele partisipa ativu iha sosiedade liuliu iha setór agrikultura,” nia hateten.
PRezidente Aautoridade Munisípiu Vikeke, Francisco C.S de G. Soares, haktuir apoia tableta hodi apoia estensionista agrikultura sira-nia servisu, maibé tenke utiliza ekipmentu sira-ne’e ho di’ak no responsablidade.
“Tanba ne’e, FAO mai hakarak apoia ekipmentu sira-ne’e, hodi fasilita estensaun agrikultrua sira-nia servisu iha setór agrikultura. Tanba ne’e, ha’u husu ba estansaun agrikultura ne’ebé destaka iha suku sira tenke fó asisténsia ba ita-nia agrikultór sira iha baze. Tableta ne’e fó la’os lori ba halimar facebook, maibé uza hodi atualiza informasaun kona-ba agrikultura nian iha baze atu ami bele hatene,” nai dehan.
Autoridade Vikeke ne’e fó hanoin ba estensaun grikultura Vikeke uza ekipamentu tableta hodi hasa’e produsaun agrikula iha munisípiu Vikeke tanba daudaun ne’e rai poténsia barak mak sei abandona, presiza estensaun agrikultura nia akompañamentu ba agrikutór sira reativa rai poténsia sira.
Diretór servisu agrikultura munisípiu Vikeke, Olivio Soares Freitas, hato’o agradesimentu ba FAO ne’ebé apoia ekipamentu no oferese formasaun klímátika durnate loron haat ba estasaun agrikula sira, ho tempu limitadu maibé fiar katak sira bele aprende buat ruma.
“Ho apoia tableta ne’e bele fasilita ona ita-nia estensaun sira, tanba sira iha suku no postu bele haruka dadus mai ami iha munisípiu. Tan ne’e, ha’u husu estensaun agrikultura sira aproveita oportunidade formasaun sira-ne’e hodi aprende ba operasaun tablet,” nia hateten.
Iha distribuisaun tableta ne’e hetan partisipa husi autoridade lokál, funsionáriu servisu agrikultura, estensionista agrikultura ne’ebé destaka iha suku sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
