Governu lansa jornál parede dijitál
DILI, 28 Abríl 2025 (TATOLI)-Governu liuhusi Sekretáriu Estadu Komunikasaun Sosiál (SEKOMS), servisu hamutuk ho parseiru Child Fund, segunda ne’e lansa ona portál ba jornál parede dijitál iha Eskola Téknika Informátika (ETI).
Reprezentante Sekretáriu Estadu Komunikasaun Sosiál (SEKOMS), atuál Vise Ministru Asuntu Parlamentár, Aderito Hugo da Costa, hatete plataforma dijitál ida-ne’e lori timor ba mundu, nune’e importante ba estudante sira atu aprende.
“Ha’u lori governu nia naran fó apresiasaun ba parte hotu espesialmente ba diretora Ezekutiva ChildFund, ne’ebe bele partipa ezekusaun programa ne’ebé brilante tebes. Iha plataforma dijitál ne’e hakarak lori Timor ba mundu, iha primeiru faze oinsá atu familiariza sosiedade Timor-Leste bele aproveita plataforma dijitál hodi reforsa di’ak liután identidade propriu sosiedade Timor-Leste nian”, Vise-Ministru Asuntu Parlamentár, hatete iha ETI, Dili.
Nia hatutan: “Se ita prenxe teknolojia informasaun sira ne’e ho di’ak, ita nia orgullu ba identidade kultura, tanba ita uza meiu komunikasaun sira hodi hatudu prátika sira ne’ebé la-reflete ba ita nia dignidade rasik ne’ebé iha ona”.
Nia dehan iha kontextu ida ne’e mak estudante no Jerente eskola sanulu resin 16 husi ESTV 10 no mós ensinu Sekundariu Jerál 6 mak ohin reprezenta hosi eskola 28 Novembru nian.
“Esperiénsia ida ha’u akompaña no sai prekupasaun mai ha’u mak programa sira ne’e rame iha lansamentu depois lansamentu nia kontinuasaun laiha”, nia dehan.
Hanesan reprezentante governu, fiar katak tékniku sira ne’ebé responsializadu programa ne’e bele ba oin. “Tinan 10 liuba ita halo liberalizasaun iha telekomunikasaun no konsege liberiza ita-nia merkadu hodi hamosu operadoór haat no otomatikamente polítika ne’e ita halo liuba ho kustu ida baratu no kualidadade ne’ebé kompetetivu husi servisu ne’ebé operadoór telekomunikasaun sira fó”, nia esplika.
Nia akresenta IX governu desde tinan kotuk instala ona ligasaun ba kabu submarinu ne’ebé ho kalkulu katak iha fimdoanu bele ona operasionaliza sistema kabu submarine, hodi nune’e bele fasilita programa sira ne’ebe ohin lansa ona.
“Nune’e iha tema ohin ne’e mak papel estudante iha era mídia modernu. Tema ida-ne’e importante tebes atu explora ita nia-an ho mídia modernu ne’e oinsá. Pontu ida-ne’ebé ita preokupa tebes mak oras ne’e Governu hamutuk ho entidade relevante kontinua halo diskusaun kona-ba oinsá atu dezeña jestaun ida di’ak relasaun ho ita nia identidade kulturál”, dehan.
Vise Ministru Asuntu Parlamentár fiar katak entidade hotu kompromete dezenvolve no kontribui ba setór edukasaun nasaun nia ne’ebé importante iha kontextu ida agora no governu nia obrigasaun atu hamutuk atu haree no kuidadu asuntu ida ne’e.
Vise Ministru, Aderito Hugo da Costa, hatete dosiedade sivilizadu reforsa prinsípiu hanesan Estadu direitu Demokrátika, nune’e Estadu ida livre, independente no seberanu, nune’e atrai prinsípiu ho di’ak no kria sosiedade ida avansadu modernu no sivilizadu.
“Ba estudante sira, projetu-ida jornál parede dijitál hanesan espasu ida atu espresa imi-nia kreatividade, kapasidade kuandu imi iha hela nivel eskola. Tanba iha tempu ami nia susar atu hetan fasilidade hanesan ne’e. Governu nia partisipasaun iha meiu ida-ne’e atu apoiu ba kreatividade, inovativu, ne’ebe mosu husi eskola sira no governu fasilita hodi dezenvolve setór ida-ne’e ho di’ak, konta ho rekursu ne’ebé setór edukasaun públiku no privadu”, dehan.
Prezidente Klibur Matadalan, Pedro Ximenes, hatete programa ne’e bele fasilita estudante atu aprende mundu jornalismu ho di’ak.
“Child Fund ne’ebé fasilita ona ami-nia estudante ETI sira ba aspetu foun teknolojia jornál parede. Mundu agora ajusta jornál parede ho formatu dijitál ne’ebé oioin no fó espasu entermu kuantidade kualidade ba estudante sira hodi aprende no publika atividade hotu-hotu eskola nian”, nia dehan.
Diretora Nasionál Child Fund iha Timor-Leste, Erina Dijkstra, dehan, programa ne’e sai hanesan espasu aprende ida ba estudante sira atu asesu informasaun no hato’o informasaun.
“Jornál parede dijitál ne’e atu hato’o estudante nia kreatividade, kolaborasaun no espíritu komunitáriu ne’ebé sei lori imajen eskola ida-ne’e ba públiku. Ho ida-ne’e, ita hamutuk hodi lori espasu ne’ebé brilante, matenek no ho nia asaun sira. Espera programa ne’e estudante sira utiliza ho seguru tantu online no offline”, Child Fund hatete.
Direitór ETI, João Gaio, haktuir lansamentu ba programa ne’e importante no presiza duni lansa hodi estudante bele asesu.
“Ohin ita halo lansamentu jornál parede dijitál nian iha eskola ida-ne’ebé transforma hosi métodu konvensionál ba iha dijitál nian no atividade ne’e realiza tanba hetan apoiu ha’u hosi parseriu Child Fund, no Sekretáriu Estadu Komunikasaun Sosiál nian”, nia dehan.
Objetivu husi jornál parede dijitál ida-ne’e mak oinsá estudante hato’o sira-nia opiniaun, deskreve kona-ba estudu nian liga ba materia ne’ebé sira aprende. Hosi ne’e espera futuru ETI nafatin asegura programa ne’e hosi Governu liuhusi Sekretáriu Estadu Komunikasaun Sosiál, parte Telekomunikasaun no mós edukasaun.
Estudante, Neria Barreto, hosi departamentu multimidia, hatete programa ne’e importante no iha vantajen ba estudante sira hodi asesu informasaun eskola nian.
“Tuir ha’u-nia hanoin kona-ba jornál parede ne’e atu estudante sira públiku informasaun kona-ba atividade eskola nian. Liuhusi programa ne’e bele hasa’e sira-nia opiniaun kona-ba atividade eskola nian ba públiku. Tantu atividade, programa no aprendizajen loron-loron nian”, dehan.
Notísia relevante: ESP Comoro Disponibiliza Biblioteka Manuál No Dijitál Ba Estudante Sira
Jornalista : Osória Marques
Editora : Rita Almeida
