DILI, 28 Abríl 2025 (TATOLI)—Xefe Departamentu Servisu Emerjénsia Médika Munisípiu Dili ein Ezersísiu, Vitór Sarmento, hateten durante misa requiem ba Sua Santidade Papa Fransisco iha Tasi Tolu, Servisu Nasionál Ambulánsia Emerjénsia no Medikamentu, Institutu Públiku (SNAEM, I.P), evakua sarani sira hamutuk na’in-13, ne’ebé mak moras no asidente iha momentu selebrasaun misa.
“Durante misa nia laran ne’e, SNAEM evakua sarani hamutuk na’in-13 ne’e kompostu hosi mane na’in-hitu no feto na’in-neen, entaun ho misa Sua Santidade Papa Fransisco nia fúnebre iha Tasi Tolu, ita estabelese postu ambulánsia iha-ne’ebá. No, ita evakua sarani sira-ne’e, balun moras estómagu, balun raan menus no balun hetan asidente,” Vitór dehan ba jornalista sira, iha nia kna’ar fatin, SNAEM, Kaikoli, segunda ne’e.
Nia dehan, sarani na’in-13 ne’e, na’in-tolu moras raan menus, na’in-hitu moras estómagu no asidente tráfegu na’in-tolu.
“Sarani na’in-13 ne’e, moras estómagu na’in-hitu (7), raan menus na’in-tolu (3) no asidente tráfegu na’in-tolu (3). Ekipa sira-ne’e kobre hosi Rotunda Prezidente Nikolau Lobato tanba iha ambulánsia lima (5), tolu kolokadu iha Altár no rua (2) kolokadu iha klaran,” Vitór relata.
Nia hatutan, sarani sira-ne’ebé mak moras iha momentu ne’ebá pesoál saúde sira evakua kedas mai iha Sentru Saúde Komoro hodi hetan tratamentu.
“Ba sarani sira dezmaia ne’e, pesoál saúde no ekipa Krúz Vermella Timor-Leste evakua kedas hodi fó tratamentu, pois ekipa halo selesaun no halo triajen laiha síklu alarma ruma ita bele halo transferénsia ba Hospital Nacional Guido Valadares (HNGV), tanba ita mós destaka pesoál saúde sira iha-ne’ebá hamutuk na’in-16,” nia konklui.
Jornalista: Felicidade Ximenes
Editór: Xisto Freitas da Piedade
