KOVALIMA, 28 Abríl 2025 (TATOLI) – Ministériu Komérsiu no Indústria (MKI), hala’o diálogu ho emprezáriu lokál iha munisípiu Kovalima liuhusi programa ‘Business Gathering’ ho emprezáriu lokál kona-ba dinamiza ekonomia.
Programa diálogu ne’e organiza hosi Ministériu Komérsiu no Indùstria liuhosi Diresaun Nasionál Marketing hala’o kooperasaun ho Kámara Komérsiu no Indústria Iha Timor-Leste (CCI-TL), IADE, SERVE-I.P, IQTL, TRADE INVEST, Banku Nasionál Komérsiu Timor-Leste (BNCTL) no entidade relevante sira seluk.
Atividade diálogu ne’e liuhusi programa ‘Business Gathering’ ho emprezàriu lokàl sira ho mekanizmu talk show ho tema “Hametin setór privadu hodi dinamiza ekonomia ne’ebé diversifikadu, sustentavel, seguru no reziliente”.
Diretór Nasionál Planeamentu MKI, Mario Filipe informa katak MKI organiza programa referidu, kona-ba dinamiza ekonomia atu eleva mikro-pekena ho tema ne’ebé mak Governu defini ona.
“Governu organiza diálogu ho empreza iha sira munisípiu Kovalima ho nia objetivu lima. Ita-nia objetivu loloos liuhusi meiu ida ita implementa programa ida-ne’e ba liuhusi diálogu Business Gathering no talk show”, Diretór Nasionàl MKI Mario Filipe, hato’o liuhusi nia diskursu ,iha salaun AMC, ohin.
Atividade diálogu ne’e ho nia objetivu prinsipál lima hanesan:
- dahuluk mak meiu ida atu fasilita intermediasaun ba kolaborasaun servisu hamutuk investidór sira ho grupu pekena no médiu empreza ho agrikultór sira.
- Daruak, atu loke ita-nia empreza tantu mikro-pekena no médiu empreza no agrikultór ne’ebé mak iha urjente no pensamentu iha kompetisaun iha nível nasionál, rejionál no internasionál.
- Datoluk, hametin kooperasaun empreza timor-oan sira ne’ebé hala’o investimentu iha setór komérsiu.
- Dahaat, atrai timor-oan sira ne’ebé iha vontade atu dezenvolve inisiativa foun hodi hala’o iha setór komérsiu no indústria ne’ebé sustentavel orienta ba kompetisaun negósiu nasionál no internasionál, no,
- Dalima, identifika no promove produtu potensiál no orientadu ba esportasaun no subsititui ba produtu importadu.
Iha sorin seluk, Sekretáriu Munisipál Administrasaun no Finansa, Albeto Moniz de Araújo dehan, atividade ne’ebé mak MKI hala’o ho nia tema ne’ebé mak relevante hodi apar kondisaun munisípiu Kovalima – ne’ebé ba futuru sai munisípiu ba atividade industrializasaun.
Prezensa MKI hodi konvida entidade hotu atu partilla informasaun nune’e bele entende prosesu la’o; tenke iha jestór ne’ebé mak di’ak, mak hanesan tenke iha planu, organiza, semak atu haboot, empreza la’o presiza rekursu no se mak kontrola.
Ho nune’e bainhira Governu atu investe osan, presiza fó ema ne’ebé mak iha planu di’ak no harii organizasaun hodi hala’o atividade nune’e investe osan nia bele ezekuta. “Atu muda mentalidade presiza rekursu tanba ne’e oportunidade ohin ita-boot sira uza oportunidade ho di’ak bainhira informasaun la klaru bele husu pergunta”, nia enkoraja.
Jornalista:Celestina Teles
Editór: Rafael Ximenes de A. Belo
