PAM Vikeke identifika jeleira rai ai-moruk vasina animál kondisaun aat
VIKEKE, 28 Abríl 2025 (TATOLI)—Prezidente Autoridade Munisipál (PAM) Vikeke, Francisco C.S de G. Soares, segunda ne’e, vizita direta diresaun pekuária konsege identifika fasilidade hanesan jjeleira ne’ebé rai ai-moruk atu vasina animal ne’e nia kondisaun aat, hodi difikulta servisu pekuária sira atende komunidade nia animál.
“Ohin. ha’u mai vizita departamentu pekuária hodi haree direta problema ne’ebé pekuária enfrenta, ita-nia fasilidade jjeleira rai ai-moruk vasina kondisaun aat hotu. Nune’e, ha’u husu direjente sira halo pedidu ba autoridade hodi husu orsamentu, atu sosa fila-fali ekipamentu sira-ne’e hodi rai ai-moruk vasina,” Francisco C.S de G. Soares hateten hafoin ramata vizita ba diresaun pekuária, iha Beloi, ohin.
Fasilidiade hanesan jjeleira rai ai-moruk vasinasaun ba animál sai importante tanba komunidade haki’ak-na’in sira iha área rurál presiza fó vasina sira-nia animál hanesan fahi, karau, manu no bibi sira.
“Ita-nia haki’ak-na’in sira iha foho ne’e sira hakarak vasina ba sira-nia animál, tanba ha’u prefere ba diretór agrikultura halo pedidu ba munisípiu hodi ita haree hodi sosa fasilidade jjeleira,” nia dehan.
Iha fatin hanesan, xefe departamentu pekuária munisípiu Vikeke, Domingos do Carmo Pinto, haktuir kona-ba fasilidade jeleira ba rai ai-moruk vasina iha Vikeke hamutuk unidade lima (5) maibé lima ne’e agora kondisaun aat hotu.
“Ami iha jeleira rai ai-moruk vasina animál nian ne’e hamutuk lima kada postu ida, maibé agora kondisaun aat hotu, ne’ebé sai difikuldade ba ami-nia servisu rai ai-moruk vasina sira. Ha’u relata ona ba nasionál dala tolu ona, maibé seidauk iha resposta. Ohin autoridade mós haree ona, ne’ebé ha’u prepara fali pedidu ba autoridade Vikeke hodi haree ami-nia problema liuliu ba jeleira sira-ne’e,” nia hateten.
Nia relata, jeleira lima (5) ne’ebé tau iha kada postu ne’e balun gás mak hotu no balun aat duni, ne’ebé servisu pekuária preziza jeleira foun ne’e unidade lima (5), atu koloka fali ba postu lima hodi fó atendementu ba komunidade nia animál.
Jornalista : Vitorino Lopes da Costa
Editór : Cancio Ximenes
