DILI, 28 Abríl 2028 (TATOLI) – Ministériu Finansas (MF) realiza atividade reuniaun inter-ministeriál ba parseiru dezenvolvimentu sira iha trimestrál tinan-2025 ho objetivu atu aprezenta kona-ba programa Governu nian ba parseiru dezenvolvimentu sira hodi apoiu ba implementasaun programa.
Vise-Ministra Finansas, Felícia de Carvalho, haktuir katak reuniaun ne’e aprezenta konteúdu matéria barak hanesan, programa propriedade Governu da-sia iha tinan-2025-2026, halo análize programa no dadus koordenasaun husi dezenvolvimentu parséria, planu estratéjia no infraestrutura husi pilar dezenvolvimentu Governu, no ikusliu mak konseitu monitorizasaun no evaluasaun framework (Enkuadramentu) iha Timor-Leste.
Governante ne’e informa, enkontru referidu hetan orientasaun direta husi Primeiru-Ministru, KayralaXanana Gusmão, hodi haree no halo avaliasaun ba implementasaun kona-ba planu, programa no progresu husi liña ministeriál sira hotu iha trimestrál dahuluk.
Iha oportunidade ne’e, Diretór Jerál DGGMRE, Francisco da Silva, esplika, parte rezolusaun Governu nian mak hakarak instituisaun Governu bele efetivu, transparante, responsavel no governasaun ne’ebé sustentavel hodi asembleia sustentabilidade ekonómiku-finanseiru.
Saida mak MF tenke halo, no saida mak liña ministeriál sira-nia responsabilidade, papél atu halo lina koordenasaun ho parséria dezenvolvimentu sira.
“Bele komunika no partilla diskusaun téknika ba programa ka projetu ne’ebé apoiu husi parseiru dezenvolvimentu sira, hafoin ne’e mak MF fasilita hodi finaliza programa liuhusi aprovasaun orsamentu”, Diretór ne’e hateten.
Enkuantu baze aprovasaun ba orsamentu ne’ebé Ministériu Finansas bele aprova, tuir ezekutivu ne’e, mak hahú husi montante 0,01-5 millaun maibé bainhira fundu ne’e liuhusi montante millaun lima ba leten, ida-ne’e kompeténsia, Konsellu Ministru mak bele aprova.
Iha fatin hanesan, Diretór Jerál Planu Orsamentu MF, José Alexandre de Carvalho, relata, reuniaun inter-ministeriál ne’e aborda objetivu tolu hanesan; panorama jerál ida kona-ba programa Governu nian, indikadór makro-ekonomia no progresu sira-ne’ebé halo tiha ona, ikusliu mak propriedade Governu ba parséria dezenvolvimentu no lina ministeriál sira.
“Atu hotu-hotu ne’ebé partisipa iha reuniaun ne’e atu ko’alia ba malu oinsá deside kona-ba panorama jerál husi programa Governu nian ba tinan 2025 to’o 2026”, nia dehan.
Estrutura programa Governu da-sia lasees husi estrutura planu dezenvolvimentu Timor-Leste nian. “Kuandu ita observa iha planu estratéjia dezenvolvimentu nasionál nian iha sub-setór hamutuk haat; dezenvolvimentu setór sosiál, infranstrutura, ekonomia no konservasaun governativa.
“Husi sub-setór haat ne’e define, Timor-Leste tenke iha kbiit katak tenke iha populasaun ne’ebé saudavél, edukadu no inkluzivu atu nafatin kontribui efetivamente ba dezenvolvimentu ne’ebé sustentavel hodi redús ki’ak iha Timor-Leste”, autoridade ne’e esplika.
Entretantu, reuniaun ne’e marka prezensa husi Vise Primeiru-ministru no Ministru koordenadór asuntu ekonómiku, Vise-Primeiru-minsitru no ministru asuntu sosiál no ministru dezenvolvimentu rurál no abitasaun komunitária, membru Governu, liña ministeriál sira kompostu husi diretór jerál sira inklui nasionál no parseiru dezenvolvimentu sira hanesan korpu diplomátiku sira rezidente iha Timor-Leste.
Jornalista: Alexandra da Costa
Editór: Rafael Ximenes de A. Belo
