DILI, 28 Abríl 2025(TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten, prontu diálogu ho komunidade afetadu iha suku Bekora, maibé prosesu alargamentu kontinua la’o nafatin.
“Kona-ba diálogu segundu, foin daudauk ha’u dehan ona ba sira, atu ba ko’alia ho MOP, hafoin ha’u iha ne’ebá maibé iha realidade sira la ba”, Sekretáriu Estadu, Germano Santa Brites Dias, ba jornalista sira iha Kuluhun, Dili, ohin.
Nia informa, maske MOP ho SEATOU hein hotu, maibé tuir informasaun husi téknika no gabinete katak sira haruka portavós komunidade afetadu mak ba.
“Sim, portavós mós afetadu hotu. Maibé, Governu presiza afetadu direta, ema ne’e para ba halo esplikasaun ne’ebé klaru,” autoridade ne’e hateten.
Sekretáriu Estadu Asuntu Toponímia no Organizasaun Urbana, Germano Santa Brites Dias hatutan, tanba la’ós portavós mesak ninia rai ka ninia uma mak hetan afetadu maibé iha komunidade lubuk boot ida mak hetan afetadu hotu ba alargamentu ka despezu administrativu ne’e.
“Entaun diálogu ne’e ba ema hothotu, la’ós ba portavós de’it, tanba portavós mai ko’alia ninia parte ketak ida, maske sai reprezentante ba komunidade hotu. Maibé, sekuandu Governu selu lahanesan no hamosu la satisfaz, portavós mak selu fila-fali ga?”, nia kestiona.
Agredese komunidade Kuluhun
Governante ne’e, iha okaziasaun ne’e, agredese komunidade suku Kuluhun tanba sira koopera di’ak loos no husu mós ba parte komunidade Bekora para koopera hodi halo servisu ba nasaun.
“Buat ida diálogu ne’e ha’u sempre prontu, atu ohin ka aban ne’e bele de’it. Maibé, atu dehan de’it katak servisu halo indemnizasaun ne’e MOP nia kompeténsia tanba SEATOU nia tékniku sira laiha kompeténsia no hatene kona-ba metru no kondisaun proriedade uma nian,” nia afirma.
“Tanba ne’e husu komunidade afetadu sira atu mai direta hodi prefere diálogu ida-ne’e ho Governu, atu nune’e parte téknika MOP bele esplika ba sira hodi komprende,” SEATOU apela.
Entretantu serbisu alargamentu segundu faze sei kontinua nafatin, tuir prinsípiu dezeñu ne’ebé mak iha.
Jornalista: Alexandra da Costa
Editór: Rafael Ximenes de A. Belo
