DILI, 28 Abríl 2025 (TATOLI)—Sekretaria Estadu Komunikasaun Sosiál (SEKOMS) ho ChildFund, formaliza akordu iha aréa literásia dijitál liuliu oinsá atu promove internet saudável ba estudante sira iha Dili no iha munisípiu nune’e estudante sira bele utiliza internet ho di’ak.
Sekretáriu Estadu Komunikasaun Sosiál, Expedito Loro Dias Ximenes, konsidera kooperasaun ida-ne’e importante tanba literásia ne’e importante atu konxiensializa estudante sira iha eskola ba asuntu mensionadu.
“Ita hotu hatene katak ho avansu teknolojia ne’e uza teknolojia ka espasu dijitál ba interese privadu, interese sosiedade no interese família nian. Entaun, presiza uza internet ne’e ho saudável. Ho nune’e mak ohin organizasaun ChildFund asina akordu kooperasaun servisu ho SEKOMS hodi konxiensializa joven no estudante sira oinsá sira bele komprende uza internet ho di’ak,” Loro Dias hateten ba jornalista sira hafoin asina akordu kooperasaun ho Child-Fund iha sala reuniaun SEKOMS, Palácio do Governo, segunda ne’e.
Governante ne’e dehan atividade sosializasaun ba literasia mídia ba estudante sira ne’e sei hahú fulan ne’e nia laran.
Iha fatin hanesan, Country Director ChildFund, Alzira Reis, hateten ohin ChildFund asina akordu koopesaun ho SEKOMS oinsá mídia sira bele divulga atividade ChildFund ba promove utilizasaun mídia sosial ho di’ak.
Nia dehan, akordu ida-ne’e ba tinan tolu no kuandu atividade ne’e la’o di’ak bele estende filafali.
“Ami-nia atividade ne’e foka liubá internet seguru, oinsá utiliza internet seguru ba iha ita-nia rai liuliu divulga informasaun ba joven sira kona-ba saúde reprodutiva, saúde inan no oan no oinsá promove pás nune’e konxiensializa joven sira bele promove pás,” nia haktuir.
Alzira esklarese, bazeia ba relatóriu ChildFund, joven sira utiliza plataforma mídia sosiál ne’e pursentu 50 no joven sira hetan abuzu bainhira utiliza rede sosiál. Tuir dadus, pursentu 80 husi joven sira uza plataforma liuliu ba sítiu sira-ne’ebé ladún apropriadu.
“Tanba ne’e mak ChildFund hamutuk ho Governu atu sosializa internet saudável ba joven no estudante sira hahú husi primária to’o ensiñu superiór nune’e konxiensializa sira uza internet ba interese pozitiva,” nia subliña.
Jornalista: Natalino Costa
Editór: Xisto Freitas da Piedade
