BAUKAU, 29 Abríl 2025 (TATOLI)—Autoridade Suku Kaibada Makasae husu Autoridade Administrasaun Munisipál (AAM) Baukau atu apoia hadi’a infraestrutura bázika sira hanesan estrada no kanaliza bee-moos ba komunidade.
Xefe Suku Kaibada Makasae, Júlio Alegria Belo, esplika Suku Kaibada Makasae foin eziste nu’udár suku foun no konsideradu seidauk iha fasilidade infraestrutura bázika sira liuliu melloramentu estrada, kanaliza bee-moos, postu saúde no fasilidade ba Pesóal Seguransa Suku (PAS).
“Ami husu Autoridade Munisipál Baukau atu halo alargamentu ba sede suku, halo melhoramentu ba ami-nia estrada, kanalizasaun bee-moos ba komunidade,” Xefi Suku Kaibada Makasae hateten bainhira realiza seremónia agradesimentu iha sede Suku Kaibada Makasae, tersa ne’e.
Júlio Belo aprezenta Suku Kaibada Makasae nu’udár suku foun ne’ebé jeografikamente kategoria iha área urbana Postu Baukau Vila maibé sei kontinua enfrenta menus infraestrutura bázika hanesan kondisaun estrada ne’ebé sei sai preokupasaun ba komunidade iha suku referidu.
Aleinde ne’e, suku referidu seidauk iha fasilidade saúde hanesan postu saúde, laiha sede suku própriu no komunidade seidauk asesu bee-moos.
Entretantu, Prezidente Autoridade Munisipál Baukau, Veneranda Lemos Martins, husu Konsellu Suku Kaibada Makasae aprezenta preokupasaun sira-ne’e iha reuniaun Asembleia Postu Administrativu (ASPA) hodi hetan ona aprovasaun, nune’e kontinua hetan aprovasaun iha reuniaun Konsellu Konsultivu Munisipál (KKM) nune’e bele koloka ba Planu Asaun Anuál iha orsamentu jerál Estadu (OJE).
“Nai Xefe Suku husu ne’e lori bá ASPA. Bainhira aprova ita sei lori bá Konsellu Konsultivu mak halo aprovasaun,” Veneranda Lemos argumenta.
Entretantu, Suku Kaibada Makasae hamutuk aldeia haat kompostu husi Boru-baha, Kaiobilale, Data-ua no Maulame ho totál populasaun hamutuk 2.584 hosi uma-kain 584.
Jornalista: Natalino Belo
Editór: Xisto Freitas da Piedade
