DILI, 29 Abríl 2025 (TATOLI)—Prezidente Repúblika, José Ramos Horta, kuarta ne’e, simu karta kredensiál husi Embaixadór Estraordináriu no Plenipotensiáriu Reinu Kamboja nian mai Timor-Leste, Chun Sovannarith, iha Palásiu Prezidensiál Nicolau Lobato, Bairu Pite, Dili.
Serimónia entrega karta kredensial ne’e, marka etapa istóriku iha relasaun diplomátika entre Timor-Leste no Kamboja no estabelesimentu embaixada rezidente dahuluk Kamboja nian iha Dili hatudu parseria ne’ebé aumenta entre nasaun rua ne’e.
“Estabelesimentu embaixada rezidente Kamboja nian iha Dili reprezenta la’ós de’it formalidade diplomátiku ida, maibé kompromisu kle’an ba aprofundamentu husi ita-nia relasaun bilateral,” Prezidente Repúblika, José Ramos Horta, hateten bainhira simu karta kredensiál husi diplomata Kamboja ne’e.
Horta dehan, Timor-Leste no Kamboja fahe esperiénsia sira kona-ba ultrapasa dezafiu istóriku sira hodi harii sosiedade pasífiku no demokrátika, hodi kria fundasaun ida ba komprensaun no kolaborasaun ba malu.
“Kamboja sai ona parseiru ida-ne’ebé folin-boot iha ita-nia viajen ASEAN nian, no ha’u fiar katak iha Embaixador CHUN nia lideransa, ne’ebé nia esperiénsia iha asuntu ASEAN partikularmente folin-boot ba ita. Ita-nia nasaun sira sei harii ligasaun amizade no kooperasaun ne’ebé metin liután,” Horta dehan.
Nomeasaun ba Embaixadór rezidente dahuluk Kambodia nian reprezenta avansu signifikativu iha relasaun diplomátika entre nasaun Sudeste Aziátiku rua ne’e no refleta importánsia Timor-Leste nian iha asuntu rejionál sira.
Chun lori esperiénsia diplomátika besik dékada tolu, inklui papel sira nu’udár Ministru-Konselleiru no Adjuntu Xefe Misaun ba Béljika, Olanda, Luxemburgu, Áustria, no Uniaun Europeia.
Nia asumi kna’ar nu’udar Adjuntu Diretór-Jeral ba Departamentu Jeral ASEAN (GDA) iha Ministériu Negósiu Estranjeiru no Kooperasaun Internasionál Kamboja nian; Superviziona Relasaun Diálogu ASEAN no Timor-Leste nia adezaun ba Membru ASEAN.
Nu’udár sobrevivente rejime Khmer Rouge, Chun nia servisu distintu halo nia simu Medalla Osan-Mean ba Servisu Distintu husi Samdech Techo HUN SEN no medalla THNAK MOHA SEREY WATH husi S.M. Liurai NORODOM SIHAMONI.
Prezidente José Ramos Horta fó bem-vindu ba Embaixadór CHUN no espresa apresiasaun ba Kamboja nia apoiu ne’ebé metin ba Timor-Leste, destaka signifikadu husi avansu diplomátiku ne’ebé loke dalan foun ba kooperasaun.
Jornalista : Hortencio Sanchez
Editór : Cancio Ximenes
