VIKEKE, 29 Abríl 2025 (TATOLI)—Xefe suku Builo, postu administrativu Ossú, munisípiu Vikeke, Helio Ximenes de Fereira, informa projetu konstrusaun ba kapela iha suku Builo ne’e ninia progresu fíziku daudaun ne’e atinje ona 95%.
“Ami hakarak ne’e inaugura iha fulan-Maiu tinan ida-ne’e maibé relatóriu ba ezekusaun orsamentu mak seidauk hotu. Tanba, iha matadalan Programa Nasionál Dezenvolvimentu Suku (PNDS) ne’e tenke iha relatóriu ezekusaun ba obra kada atinijimentu nian, entaun ekipa sira dadaun ne’e sei prepara relatóriu. Hafoin relatóriu finaliza, ami sei halo preparasaun ba inaugurasaun,” Xefe Suku Helio Ximenes de Fereira hateten ba Agcia Tatoli, iha postu Vikeke Vila, ohin.
Kontrusaun obra Kapela Builo durante ne’e la’o ho lalais, nune’e atinjimentu halo ona 95% no husi progresu ne’e taka kakuluk ho zinku, reboka, taka keramik no instalasaun eletrisidade ramata ona, no agora daudaun ne’e badaen sira sei kontinua servisu konstrui jardín iha areadór kapela nian.
Nia dehan, bainhira obra kapela ne’e ramata mak sei benifísia ba komunidade ne’ebé hela iha suku Builo, hodi uza ba selebrasaun misa domingu no seluktán.
“Kapela Builo ne’e uluk iha, maibé aat tiha. Nune’e, ami husu fundu ba Ministériu Adiministrasaun Estatál (MAE) hodi reabilita ami-nia kapela ne’ebé kondisaun aat, tan ne’e mak ami hetan fundu hodi reabilita kapela. Reabilitasaun ba kapela ne’e, ami haree ami-nia orsamentu restu iha, ne’ebé ami uza reabilita mós rezidénsia ba kapela nian,” nia hateten.
Enkuantu, Kapela Builo gasta oramentu PNDS ba tinan 2024 ho totál hamutuk $48,773,00 no obra referida hahú halo konstrusaun iha fulan-Novenbru 2024, ne’ebé konstrui husi badaen sira husi Remexio, munisípiu Aileu.
Tuir dadus suku Builo ho totál aldeia hamutuk haat ne’ebé kompostu husi aldeia Buareka, Builo, Derulo no aldeia Lutugia ho totál abitante hamutuk 1,301 no total uma kain hamutuk 288.
Jornalista : Vitorino Lopes da Costa
Editór : Cancio Ximenes
