BAUKAU, 29 Abríl 2025 (TATOLI)—Ministériu Agrikultura, Peska, Pekuária no Floresta (MAPPF), tersa ne’e, realiza sensibilizasaun kona-ba Sistema Rezíduu Sólidu Urbana no Jestaun Estasionamentu ba pesoál estensionista sira iha Munisípiu Baukau.
Diretór Jerál Agrikultura, Kafé no Planta Indústria iha Diresaun Nasionál Estesaun MAPPF, Martinho Laurentino Soares, esplika sensibilizazaun referida atu hakbiit estensionista sira hodi hala’o kna’ar bainhira halo asisténsia iha munisípiu, postu no suku sira iha Baukau.
“Objetivu mak ho hanoin atu hakbiit estensionista sira liuhosi manuál ne’ebé preparadu no hetan apoia husi parseiru dezenvolvimentu tomak inklui hetan orsamentu husi governu Austrália,” Martinho hateten iha Salaun Apuramentu Administrasaun Vila Nova, Baukau.
Martinho Soares salienta, bazeia ba polítika podér lokál no desentralizasaun administrative, pesoál estensionista sira atuál administrativa iha Ministériu Administrasaun Estatál (MAE) liuhosi Autoridade Administrasaun Munisipál mak kontrola, enkuantu relasiona ho kapasitasaun, formasaun, tékniku asisténsia sei kontinua apoia husi MAPPF liuhosi Serbisu Munisipál Agrikultura.
MAPPF kontinua sosializa no distribui manuál ba estensionista inklui hato’o ba Autoridade Administrasaun Munisipál ne’ebé foku ba kna’ar no kompeténsia MAE hanesan orsamentu saláriu no vensimentu, finansia ba atividde no prosesu rekrutamentu.
Nia rekomenda ba Autoridade Administrasaun Munisipál (AAM) liuhosi Serbisu Munisipál Agrikultura atu iha futuru bele planu rekrutamentu ba pesoál estensionista sira hodi kompleta menus rekrusu umanu iha suku hotu ne’ebé kompeténsia no finansia husi MAE.
“Agora bá-oin governu lokál presiza konsidera ona tuir manuál ne’ebé ohin sosializa,” nia esklarese.
Enkuantu, MAPPF komprometidu kontinua apoia ekipamentu hanesan uniforme, pasta, livru no tableta hodi atualiza dadus inklui ministériu sei kontinua aloka orsamentu atu fasilita formasaun ka kapasitasaun.
Sensibilizasaun ne’e bazeia ba Dekretu-lei númeru: 2/20217, loron 22 Marsu, kona-ba Sistema Jestaun Rezíduu Sólidu Urbana no Dekretu-lei númeru: 3/2017, loron 22 Marsu, kona-ba Rejime Estasionamentu ne’ebé partisipa husi estensionista iha Munisípiu Baukau.
Entretantu, estensionista konsideradu seidauk sufisiente tanba atuál iha tótal na’in-36 ne’ebé hala’o asisténsia ba suku 62 husi postu administrativu ualu iha Munisípiu Baukau.
Jornalista: Natalino Belo
Editór: Xisto Freitas da Piedade
