VIKEKE, 29 Abríl 2025 (TATOLI)—Komandante Polísia Nasionál Timor Leste (PNTL) munisípiu Vikeke, superintendente Antonio Rego Fernandes, informa PNTL munisípiu Vikeke konsege instala ona Konsellu Polisiamentu Komunitária (KPK) iha suku 30 hodi apoiu seguransa ba PNTL iha suku sira.
“Iha Vikeke ami establese ona KPK iha suku hamutuk 30, sei falta suku 8 maka seidauk forma KPK. Ba establese KPK ne’e, ami hetan apoiu husi parseiru The Asia Foundation (TAF) hodi redús ba kazu violénsia doméstika sira iha munisípiu Vikeke,” Superintendente António Rego Fernandes hateten ba Agência TATOLI, iha Vikeke, ohin.
Nia subliña, PNTL munisípiu Vikeke sei kontinua esforsu hodi establese KPK ba suku ualu (8) ne’ebé mak seidauk forma KPK.
“Ami planu ona tempu badak nia laran, ami sei ba suku ualu ne’ebé seidauk forma KPK. Prosesu forma KPK tenke liuhusi formasaun seguransa nian ba membru KPK sira, depois formasaun ne’e ramata tiha, foin ami ba fó tomada pose ba sira,” Komandante PNTL munisípiu Vikeke ne’e relata.
Nia realsa, suku sira-ne’ebé seidauk forma KPK mak hanesan husi postu Uatulari iha suku lima (5) no postu Ossú iha suku tolu (3).
“Iha fulan oin mai, ami hahú ba postu Uatulari hodi fó formasaun ba membru KPK sira, depois Uatulari ramata ami kontinua ba postu Ossú. Ba tinan ida-ne’e, ami fiar katak sei estabelese hotu KPK iha suku 38 iha munisípiu Vikeke,” Nia akresenta.
Kona-ba establese KPK, nia dehan, durante ne’e KPK sira suku apoia tebes ba PNTL tanba establese KPK sai hanesan matan no tilun ba parte seguransa nian.
“Nune’e, ba knaar KPK iha suku ne’e, sira sei servisu hamutuk ho ita-nia lia-na’in sira iha suku, hodi rezolve problema sosiál sira no identifika problema sira seluk ne’ebé mosu iha suku hodi resolve,” nia hateten.
Kona-ba estrutura membru KPK iha suku kompostu husi konsellu suku, xefe suku, xefe aldeia, delegadu, delegada, juventude feto no mane sira iha suku sira.
Jornalista : Vitorino Lopes da Costa
Editór : Cancio Ximenes
