DILI, 29 Abríl 2025 (TATOLI)—Sekretaria Estadu Formasaun Profisionál no Empregu (SEFOPE), aban (30 Abríl 2025), sei realiza semináriu nasionál kona-ba Loron Mundiál Traballadór ho tema “Promove justisa sosiál no traballu dignu ba traballadór sira iha Timor-Leste” hodi kria armonizasaun ba kondisaun servisu ne’ebé mak seguru.“Loron 01 Maiu ne’e Loron Mundiál Traballadór sira-nian. Tanba ne’e, SEFOPE liuhusi Diresaun Nasionál relasaun traballu sei halo semináriu nasionál ida ne’ebé sei realiza iha salaun Luz Clarita,” Diretór Jerál SEFOPE, Carlito Rosário Cabral hateten ba jornalista sira, iha nia kna’ar fatin, Kaikoli, tersa ne’e.
Nia hateten, iha semináriu ne’e sei konvida parte relevante sira hanesan reprezentante sindikatu traballadór, CCI-TL, empreza sira no husi Governu mak SEFOPE no ministériu relevante sira hodi komemora loron referidu.
“Ita hakarak fó mensajen ba loron 01 Maiu. Husu ba traballadór sira tantu traballadór públiku no privadu, loron ita-nian ita bele komemora ho atividade ne’ebé bele apoiu malu atubele hadi’a ita idak-idak nia moris iha ida-idak nia servisu fatin,” Carlito informa.
Nune’e, nia husu mós ba empregadór sira atu konsidera traballadór sira-nia ezijénsia ruma, nune’e parte rua sai hanesan parseiru hodibele hasa’e kreximentu iha empreza referida, nune’e bele asegura vida ekonomia iha rai-laran.
“Ha’u hato’o ha’u-nia parabéns ba maluk traballadór sira hotu. Ida-ne’e loron ita nian. Karik hato’o ezijénsia ruma bá Estadu, hato’o ho pasífiku. Direitu sira-ne’ebé ita-boot sira sente dehan tempu ona atu konsidera no valoriza bele hato’o, maibé ho termu pasífiku ba ita-nia Estadu, nune’e bele hadi’a sai di’akliu atu asegura kreximentu ekonómiku iha ita-nia uma-laran no mós ita-nia nasaun,” nia relata.
Carlito fó mensajen espesiál ba joven sira-ne’ebé seidauk hetan servisu atu esforsa aan hodi kapasita aan atubele responde ba oportunidade servisu iha rai-li’ur, tanba SEFOPE nafatin buka dalan halo akordu ho nasaun sira-ne’ebé hakarak simu joven sira.
Jornalista: Felicidade Ximenes
Editór: Xisto Freitas da Piedade
