DILI, 30 Abríl 2025 (TATOLI)—Komisáriu Komisaun Antí Korrupasaun (CAC-sigla portugés), Rui Pereira dos Santos, hateten nasaun rua, Marshall Island no Bulgária inklui the United Nations Official Document System (UNODS) sei mai Timor-Leste iha fulan-Maiu ne’e hodi halo avaliasaun kona-ba dokumentu United Nations Commission Against Corruption (UNCAC) ne’ebé Timor-Leste ratifika ona.
Nia dehan, Timor-Leste nu’udár nasaun ne’ebé hola parte iha UNCAC presiza halo avaliasaun dokumentu UNCAC ne’ebé Timor-Leste ratifika ne’e ida-ne’ebé mak Timor-Leste (TL) konsege atinje ona.
Tanba ne’e, Komisaun Antí Korrupasaun konvoka Tribunál, Ministériu Públiku, Polísia, Sosiedade Sivíl, Emprezáriu sira inklui vokál point liña minsteriál hodi atualiza kona-ba vizita ekipa UNCAC ne’ebé sei mai fulan-Maiu ne’e.
“Ohin ne’e, ita enkontru ho pontu vokál sira hotu ba preparasaun country visit husi nasaun Marshall Island no Bulgária hamutuk ho Sekretariadu UNODS kona-ba self assessment ne’ebé mak Timor-Leste presiza atu haree liuliu ba dokumentu sira-ne’ebé mak liga ho UNCAC nian ne’ebé ita ratifika ona,” nia tenik.
Rui hateten, instituisaun hotu-hotu ne’ebé mak iha hanesan CAC, Ministériu Públiku, Tribunál, Polísia, Sosiedade Sivíl, Mídia inklui entidade sira seluk presiza hato’o relatóriu ba CAC liga ba prevensaun korrupasaun iha kada instituisaun.
“Sira atu mai haree hodi halo avaliasaun kona-ba saida mak Timor-Leste atinje liga ho prevensaun korrupasaun iha Timor-Leste,” nia hateten.
Komisáriu ne’e hatutan daudaun ne’e instituisaun hotu hato’o ona sira-nia relatóriu kona-ba CAC liga ho prevensaun korrupasaun, nune’e ekipa UNCAC mai sira bele aprezenta ba hirak-ne’ebé seidauk konkluidu, CAC fó loron sanulu atu sira kompleta.
Nia dehan, ekipa ne’e sei mai iha loron 26 Maiu no iha loron 27-29 Maiu, sei diskute kona-ba UNCAC nian no iha loron 30 Maiu ekipa hamutuk CAC no entidade hotu-hotu sei ko’alia kona-ba estratéjia antí korrupasaun nian.
Rui informa, iha enkontru UNCAC ne’e mak sei aborda kestaun kona-ba Timor-Leste ninia kompromisu ba prevensaun korrupsaun no sei haree hodi halo avaliasaun kona-ba UNCAC ninian liuliu saida mak halo ona liga ho serbisu prevensaun korrupasaun, nune’e ida-ne’ebé karik seidauk to’o ninia atinjimentu hamutuk ho ekipa UNCAC bele mellora di’ak liután iha futuru.
Jornalista: Natalino Costa
Editór: Xisto Freitas da Piedade
