VIKEKE, 30 Abríl 2025 (TATOLI)—Diretór Programa Nasionál Dezenvolvimentu Suku (PNDS) munisípiu Vikeke, Francisco Soares Varela, informa Ekipa PNDS munisípiu Vikeke sei implementa projetu PNDS ba tinan 2026 nian hamutuk 56.
“Ba tinan 2026. ita iha projetu hamutuki 58 maibé ita iha mudansa, entaun ita iha hamutuk 56 ne’ebé hetan ona apresizasaun unanimidade iha Konsellu Konsultivu Munisípiu (KKM) Vikeke. Ba projetu sira-ne’e, ita PNDS Orsamentu iha ona, nune’e ita-nia enjiñeru PNDS sira halo planu orsamentu ba kada suku sira-nian,” Francisco Soares Varela hateten iha salaun administrasaun Vikeke, ohin.
Diretór PNDS munisípiu Vikeke ne’e hatutan, projetu sira-ne’e liuhusi prosesu naruk, dahuluk identifikasaun husi nivel aldeia, ba suku no ba postu, depois lori mai munisípiu Vikeke hodi hetan apresiasaun.
“Ha’u husu ba autoridade sira, karik porjetu sira-ne’e iha mudansa, ita sei komunika direta ba suku ida-ne’ebé mak hakarak muda projetu hodi ita bele implementa iha tinan oin,” nia dehan.
Nia hateten, suku 38 ne’ebé eziste iha munisípiu Vikeke hetan hotu projetu ne’ebé balun periorídade bee-moos, suku balun estrada ba suku laran, reabilitasaun aldeia, kapela, dapur eskola no seluk tán.
Nune’e, ba projetu ba tinan 2026 ho totál orsamentu hamutuk $1,722.500 hodi finansia ba programa perióridade sira-ne’ebé mai husi suku 38 iha munisípiu Vikeke.
Iha fatin hanesan, xefe suku Dilór, postu Lakluta, Jacinto Ximenes, hato’o agradesimentu ba programa PNDS, maske orsamentu kiik maibé ninia benifísiu ne’e ba duni abitantete sira sente.
“Planu peirorídade mai husi suku, ne’ebé suku haat iha postu Lakluta ne’e iha programa haat, suku Dilór loke dalan estrada beton bá aldeia Aidak Oan, suku Ahic mós estrada Beton aldeia Hale Oan, suku Laline uma ba profesór no suku Uma Tolu dada bee-moos sistema Bomba. Programa sira-ne’e sai importante ba ita-nia populasaun sira iha suku,” nia dehan.
Jornalista : Vitorino Lopes da Costa
Editór : Cancio Ximenes
