Prezidente Komisaun D husu Governu aselera altera lei saláriu mínimu
DILI, 30 Abríl 2025 (TATOLI)—Prezidente Komisaun D iha Parlamentu Nasionál (PN) ne’ebé trata asuntu Ekonomia no Dezenvolvimentu, Ricardo Baptista, husu ba Governu liuhusi Sekretaria Estadu Formasaun Profisionál no Empregu (SEFOPE) atu aselera prosesu alterasaun lei Traballu númeru 4/2012, 21 Fevereiru.
Ezijénsia ne’e hodi hadi’a traballadór setór privadu no públiku nia saláriu mínimu.
“Liga ba asuntu saláriu mínimu, lei ne’e SEFOPE mak trata hela, hanesan foin daudaun iha debate Orsamentu Jerál Estadu (OJE) mós ami husu ba sira no sira hateten dehan lori ona ba Konsellu Ministru (KM), maibé depois haree hodi fó fila ba SEFOPE no sira hateten sei prepara filafali lei ne’e hodi lori fali mai Konsellu Ministru atubele hodi bá Parlamentu hodi diskutez Proposta mai husi sira tanba sira mak ezekutadór,” Prezidente Komisaun hato’o kestaun ne’e relasiona ho loron Mundiál Traballadór ne’ebé mundu tomak inklui Timor-Leste sei komemora iha 01 Maiu.
Nune’e, nia husu atu aselera no prosesa hodi bele finaliza iha tinan ne’e nia laran.
Tuir planu Komisaun D mós sei bolu SEFOPE hodi hatene liután progresu sira atu halo alterasaun ne’e.
“Asuntu saláriu mínimu traballadór iha kraik hein hela lei ida-ne’e, tanba ita hotu hatene no rekoñese situasaun katak ita-nia merkadu agora ho saláriu mínimu atuál ne’ebé iha la korresponde ona ho situasaun atuál,” nia akresenta.
Notísia relevante : SEFOPE prepara Ezbosu Lei Traballadór Doméstiku
Deputadu husi Bankada Congresso Nacional de Reconstrução de Timor (CNRT) husu ba entidade tutela atu tau-atensaun ba serbisu liu oras serbisu, traballadór doméstiku, no kestaun seluk hodi nafatin proteje traballadór hotu nia direitu iha serbisu fatin hodi labele hetan violasaun.
Biban ne’e, Prezidente Komisaun D parabeniza traballadór hotu tantu iha setór públiku no privadu iha rai-laran tanba konsidera papel traballadór importante tebes iha dezenvolvimentu nasaun.
“Sein traballadór mak atividade hotu bele laiha, hato’o mensajen ita nafatin serbisu ba ita-nia rai,” nia tenik.
Deputada Bankada Frente Revolusionária de Timor-Leste Independente (FRETILIN), Lídia Norberta Martins, felisita traballadór timoroan hotu no konsidera traballadór nia papel importante iha dezenvolvimentu nasaun.
Nune’e, Deputada ne’e husu ba entidade kompetente atu tau-atensaun liután ba traballadór timoroan iha rai-li’ur tamba sira mós fó remesa boot mai rai-laran hodi hadi’a ekonomia família nian.
Jornalista : Nelson de Sousa
Editora : Julia Chatarina
