BAUKAU, 30 Abríl 2025 (TATOLI)—Sekretaria Estadu Formasaun Profisionál no Empregu (SEFOPE) Munisípiu Baukau durante tinan-2025 rejista kazu disputa traballadór hamutuk na’in-20.
Mediadór SEFOPE Munisípiu Baukau, Basílio Ramos das Neves, esplika husi númeru referidu maihosi kompañia neen kompostu mane na’in-19 no feto ida ne’ebé kompañia rua mak kontinua ba Konsellu Arbritrajen, ida rezolve internál no kompañia tolu mak rezolve liuhosi mediasaun.
“Desputa laborál hamutuk kompañia neen, rezolve ona kompañia haat no kompañia rua mak transfere ba Konsellu Arbitrajen,” Mediadór SEFOPE Baukau informa ba TATOLI iha nia kna’ar fatin, Vila Nova, Baukau, kuarta ne’e.
Kompañia neen referida kompostu kompañia lokál hamutuk lima hanesan Amadór ne’ebé rejista kazu traballu na’in-neen no rezolve ona na’in-ida, Evip Marel Unip. Lda rejista kazu disputa traballadór na’in-ida no kontinua ba Konsellu Arbitrajen, Amaro Delzanjho Unip. Lda rejista kazu ida no kontinua ba arbitrajen, Ho Mosan, Lda kazu ida konsege rezolve liuhosi mediasaun, Zilu Vifre Unip. Lda rejista kazu traballadór na’in-10, rezolve internál ida no sia seluk sei iha prosesu.
Enkuantu, Kompañia Internasionál Shanghai Construction rejista kazu disputa traballadór ida no kontinua bá iha Konsellu Arbitrajen hodi buka solusaun.
“Kazu maihosi saláriu tarde mosu dezentendimentu no traballadór hato’o keixa nune’e ami halo notifikasaun,” Basilio Neves akresenta.
Entretantu, husi kazu haat ne’ebé konsege rezolve tantu internál ho mediasaun rezultadu kompañia sira halo indemnizasaun ba traballadór ho orsamentu $5.504.
Husi kompañia haat ne’ebé halo indemnizasaun kompostu Amadór ho orsamentu hamutuk $682, Amaro Delzanjho Unip. Lda $380, Ho Mosan Lda $2.942 no Zilu Vifre Unip. Lda totál indemnizasaun hamutuk $1.500.
Jornalista: Natalino Belo
Editór: Xisto Freitas da Piedade
