Top

Sekretáriu Estadu Arsénio kolleta Bafo kayrala iha Hera

Sekretáriu Estadu Kooperativa, Arsénio Pereira, kolleta Bafo Kayrala iha Hera. Imajen TATOLI/Felicidade Ximenes

DILI, 30 Abríl 2025 (TATOLI)— Sekretáriu Estadu Kooperativu, Arsénio Pereira, kuarta ne’e, kolleta Bafo Kayrala iha Aldeia Sukaer-Laran, Suku Hera, Postu Administrativu Kristu Rei, Munisípiu Dili.

“Ohin ita mai kolleta Bafo Kayrala ne’ebé mak Grupu Aikehi-Laran kuda. Munisípiu Dili foin mak koleta dahuluk ai-han ne’e,” Arsénio hateten ba jornalista sira.

Nia hateten, hanesan Sekretáriu Estadu sente orgullu ba programa ida-ne’e, tanba grupu sira hatudu rezultadu di’ak, maski ema hotu hatene katak iha teknikamente   kondisaun rai tenke presiza nutrisaun, maibé ida-ne’e iha kedas mota-laran no fatuk mak barak no fuan ladún másimu maibé nafatin agradese.

“Ita haree bafo ne’e nia moris mak hanesan ne’e. Importante nia musan uitoan, oinsá ita bele tau hamutuk bele sai barak liután. Iha Munisípiu Dili foin dahuluk, maibé iha fatin barak sira husu ha’u atu bá kolleta iha  Munisípiu Kovalima, Manufahi, Likisá, Manatutu no Vikeke,” nia dehan.

Nia esplika, Timor-Leste la’ós kuda de’it no kolleta de’it, maibé prosesu pós-kolleta ne’e tenke iha lista senária atu prosesa hodi dulas nia bá foos, dulas bá ai-farina, depois ida-ne’e prosesa bá produtu sinál sira-ne’ebé iha.

“Ezemplu, ita bele halo dosi, bele halo paun no ice-cream. Konforme tuir ita-nia hakarak no tuir nesesidade merkadu,” nia afirma.

Arsénio haktuir, semana oin tan sei halo esportasaun produtu ne’e bá Malázia inklui produtu sira seluk hanesan mina-nuu, bani-been, kafé no seluk tan hodi halo promosaun  liuhusi diresaun ne’ebé mak toma konta ba ida-ne’e.

Nia esplika kapasidade Sekretaria Estsdu Kooperativu (SEKOOP) nian seidauk natoon atu fornese mákina ka tratór tanba durante ne’e fó asisténsia téknika no mesinária sira-ne’e SEKOOP halo koordenasaun ho Ministériu Agrikultura no Peska (MAP) iha munisípiu sira.

“Tanba ne’e, ohin kolleta, ita seidauk hatene nia kuantidade loloos, tanba ida-ne’e hotu ita sei tetu maizumenus totál hira depois mak produtu sira-ne’e ami fasilita atu fornese bá merenda eskolár,” nia relata.

Iha fatin hanesan, Koordenadór Grupu Aikehi-Laran, Adriano Cardoso, agradese ba SEKOOP ne’ebé ohin bele hakat bá Hera hodi kolleta Bafo Kayrala ne’ebé sira kuda.

“Ha’u sente kontente tanba SEKOOP rasik mai kolleta Bafo Kayrala ne’ebé mak ami kuda,” Adriano haktuir.

Nia dehan, Grupu Aikehi-Laran kompostu husi ema na’in-27, mane 23 no feto na’in-haat.

Jornalista: Felicidade Ximenes

Editór: Xisto Freitas da Piedade

Publisidade

Leave a Reply

Latest Post

error: Content is protected !!