VIKEKE, 30 Abríl 2025 (TATOLI)—Xefe suku Makadike Uaitame, postu Uatulari, munisípiu Vikeke, José Pinto Soares, informa sede suku Makadike Uaitame seidauk asesu ba liña eletrisidade, tanba ne’e seidauk bele utiliza fasilidade suku komputadór ne’ebé Governu oferese ba kada suku.
“Komputadór foin lalais Ministériu Administrasaun Estatál (MAE) apoia ona komputadór ba ami, maibé agora eletrisidade laiha ne’ebé rai de’it iha sede suku. Bainhira komunidade halo karta deklarasaun ruma, ha’u haruka sira ba print out iha ema-nia rental, depois sira lori mai mak ha’u asina. Karik ami mak halo karta ruma, ami mós ba halo hotu ema-nia rental,” José Pinto Soares hateten ba Agência TATOLI iha resintu administrasaun Vikeke, ohin.
Xefe suku Makadike Uaitame ne’e sente eletirisidade sai hanesan difikuldade ba autoridade suku nomós ba abitante suku Makadike Uaitame, nune’e presiza halo ka hakerek karta ruma ne’e tenke ba ema-nian rental.
Maske iha fasilidade komputadór, nia dehan, maibé labele uza hodi atende ba abitante sira liuliu ba karta deklarasaun sira.
“Eletrisidade laiha ne’e sai hanesan difikuldade ida ba ami autoridade sira no mós ami-nia abintante sira-ne’ebé iha suku. Tanba distánsia husi suku mai Vila mós dook. Nune’e print out karta ruma ami tenke mai Vila mak print dokumentu sira,” nia dehan.
Ho ida-ne’e, nia husu Governu dada ahi eletrisidade ba suku Makadike Uaitame hodi komunidade sira asesu no suku bele utiliza ekipamentu komputadór hodi fó-atendementu ba komunidade.
“Ami hato’o ona ami-nia preokpuasaun, maibé seidauk responde. Tanba ne’e, ha’u hakarak husu ba Governu tau matan ba ami hodi dada liña eletrisidade atu ami bele asesu,” nia dehan.
Tuir dadus, suku Makadike Uaitame totál uma-kain 200 no totál abitante hamutuk 686.
Hatán ba preokupasaun ne’e, Koordenadór Eletrisidade de Timor-Leste, Empreza Públiku (EDTL, E.P), Eduado Sarmento, hateten kona-ba, preokupasaun husi autoridade suku Makadike Uaitame ba eletrisidade ne’e agora daudaun projetu ida implementa ona iha aldeia Sana, suku Uaitame.
“Agora daudaun ita-nia projetu ida implementa ona iha aldeia Sana. Kundu ida-ne’ebá ramata tiha mak ita sei haree. Tanba ne’e, bazeia ba Palanta no Kadernu Enkargu ka Nill of Quantity (BoQ). Projetu agora la’o finaliza ita kontinua ba uma kain sira-ne’ebé seidauk asesu ba eletrisidade,” mia dehan.
Jornalista : Vitorino Lopes da Costa
Editór : Cancio Ximenes
