VIKEKE, 02 Maiu 2025 (TATOLI)—Federasan Atletizmu Timor-Leste (FATL) liuhusi asosiasaun atletizmu munisípiu Vikeke, sesta ne’e, realiza kompetisaun desportiva atletizmu kids ba estudante sira iha postu administrativu Vikeke Vila.
Reprezentante Prezidente Autoridade Munisípiu Vikeke, Luis Antonio F. Soares, hateten eventu kompetisiaun atletizmukids sai hanesan desportu fíziku ida-ne’ebé la’o, hala’i, lempar lembing, ida-ne’e desportu báziku ba desportu hotu-hotu.
“Liuhusi desportu atletizmu ida-ne’e, ita mós bele halibur ita-nia oan estudante sira, hodi sai hanesan animasaun ida ba estudante sira. Atu halakon deferensa sira-ne’ebé estudante sira enfrenta iha eskola. Ho desportu ida-ne’e ita bele halo sira kontente hodi hasa’e espirítu, kontente ba estudante sira nomós saúde ba estudante sira,” Luis Antonio F. Soares hateten ba jornalista sira iha kampu demokrasia postu Vikeke Vila, ohin.
Nune’e, nia reafirma, atividade atletizmu referida ajuda eduka estudante sira, iha dixiplina moris loro-loron nian, iha eskola no iha komunidade no ba família.
“Tanba liuhusi desportu sira-ne’e, ita eduka ita-nia oan sira oinsá, sira bele responsavél ba sira aan. Tan ne’e, atividade sira-ne’e sai importante ba estudante sira,” nia dehan.
Iha fatin hanesan, reprezenta Ministériu Juventude, Desportu no Arte Kultura (MJDAK), atuál pontu fokál MJDAK munisípiu Vikeke, Alfredo Baros Clever, hatutan atividade atletizmu sai hanesan baze fundamentál ba estudante sira, oinsá estudante sira bele hatene desportu área atletizmu nian.
“Ohin, asosiasaun atletizmu Vikeke realiza atividade atletizmu kids ba estudante hodi prátika desportu atletizmu iha kampu laran. Atividade atletizmu kompostu husi halai estafeta, lempar lembing hodi kapasita estudante sira-nia mentalidade tanba estudante sira-ne’e mak futuru ba desportiva sira,” nia hateten.
Iha biban ne’e, komisaun organizadora kompetisaun Atletizmu, Deonizio da Costa Soares, hateten objetivu ba realizasaun kompetisaun atletizmu atu transforma desportu atletizmu ba estudante hodi sira iha abilidade no koñesementu ba desportu referida.
“Tanba ne’e, ita ohin realiza eventu atletizmu iha Vikeke. Ha’u fiar katak ho atividade sira-ne’e ba futuru estudante sira bele iha koñesementu ba desportu atletizmu. Atu nune’e estudante sira bele iha mentalidade ida di’ak no estudante sira labele estraga sira-nia aan ba hemu tua no fuma sigaru,” nia hateten.
Kona-ba enventu ne’e, nia dehan, kompetisaun world atletic kids ne’e loloos estudante sira iha munisípiu Vikeke partisipa hotu, maibé haree ba farda ne’ebé la sufisiente, entaun asosiasaun Atletizmu Vikeke eskolla eskola haat ne’ebé kompostu husi eskola Café Vikeke, EBF 09, EBF 04 no EBC Kabira-Oan ho totál estdudantee na’in-98, ne’ebé kada eskola ida reprezenta estudante na’in-24.
Kompetisiaun ne’e estudante husi idade 08-13 mak partisipa atividade tolu mak hanesan halai estafeta, javeling (lempar lenbing) no seluktán.
“Ba kompetisaun ne’e ami la oferese prémiu ba manán-na’in sira, maibé husi eventu ida-ne’e oinsá ita hatudu atividade desportu atletizmu nian,” nia dehan.
Kompetisaun ne’e partisipa husi servisu edukasuan munisípiu Vikeke, autoridade lokál, profesór, estudante sira no eventu ne’e hala’o durante loron ida iha kampu demokrasi Vikeke.
Jornalista : Vitorino Lopes da Costa
Editór : Cancio Ximenes
