KOVALIMA, 02 Maiu 2025 (TATOLI) – Autoridade Munisípiu Kovalima, liuhusi Servisu Munisipál Protesaun Sívil, Jestaun Dezastre Naturál (SMPSJRDN), preparadu antesipa dezatsre naturál liuliu prepara ona sentru evakuasaun tolu atu evakua vítima sira, bainhira tempu udan akontese dezastre naturál, iha Munisípiu Kovalima.
Diretór servisu munisipál protesaun sívil, jestaun dezastre naturál, João Martins, esplika katak kada tinan komunidade husi postu administrativu Suai, Zumalai no Timor mak sempre afetadu ba dezastre naturál ho tipu inundasaun no seluktan.
“Ami preparadu. Ne’ebé, daudaun ne’e udan hela, ami prepara atu responde situasaun dezastre naturál, preprara ona apoiu emerjénsia item 21. Bainhira akontese kualker tipu dezastre ami prontu atu evakua vítima iha sentru evakuasaun tolu”, João Martins dehan ba TATOLI, iha Bairru Costa, ohin.
Dirijente ne’e dehan, sentru evakuasaun tolu ne’e ho nia lokalizasaun hanesan, iha postu Suai lokaliza iha Eskola Sekundáriu Jerál Públiku Suai, iha Zumalai ne’e iha Eskola sekundáriu Zumalai no iha Tilomar iha suku Maudemo ne’ebé hetan apoiu husi parseiru – Ajénsia internasionál Organizasaun Internasionál ba Migrasaun (OIM).
Konstrusaun sentru evakuasaun iha Tilomar ho Zumalai ne’e, autoridade Kovalima hetan apoiu husi parseiru ajénsia Internasionál IOM ho nia orsamentu kada sentru evakuasaun ho montante orsamentu hamutuk rihun $ 25 kada sentru evakuasaun ne’ebé finaliza halo kontrusaun ona.
“Hafoin estabelese sentru evakuasaun, autoridade Kovalima mós prepara atu fó apoiu emerjénsia ai-han ho la’ós ai-han. Bazeia ba ami-nia meta no indikadór bele responde ba xefe família mínimu 700 másimu 800”, nia dehan.
Preparasaun autoridade atu fó apoiu ba vítima sira, daudaun ne’e, iha armazen item hamutuk 21 apoiu emerjénsia ai-han mak hanesan foos supermie, Mina-te’in, kafé no masin-midar, biskuit, susu-been, ikan sardina no la’ós ai-han mak hanesan lona, biti, sanan, tasu, toalla, sabaun no rinso.
Ho nune’e nia husu ba komunidade sira atu hadook aan husi fatin risku, labele konstrui uma iha fatin risku, hamoos drainajen nune’e bee labele intupidu hodi hamosu inundasaun no bainhira tempu udan hadook aan husi mota.
Jornalista:Celestina Teles
Editór :Rafael Ximenes de A. Belo
