VIKEKE, 02 Maiu 2025 (TATOLI)—Reprezentante Prezidente Autoridade Munisípiu Vikeke, Luis Antonio F. Soares, prefere ba Servisu Edukasaun Munisípiu Vikeke no Ministériu Edukasaun (ME) desportu atletizmu tenke tau ba kurríkulu eskolár hodi estudante sira prátika desportu iha eskola.
“Ohin ita-nia Prezidente Autoridade Munisípiu Vikeke fó mensajen katak ba futuru bele tau ba kurríkulu eskolár, hodi hanorin estudante sira iha eskola. Tanba atividade desportu atletizmu ida-ne’e ita atu motiva ita-nia estudante sira,” Luis Antonio F. Soares hateten ba Agência TATOLI iha kampu demokrasia Vikeke Vila, ohin.
Tanba ne’e, nia dehan, desportu atletizmu ne’e atividade desportu ida nune’e atletizmu sai báziku ba desportu hotu-hotu nian.
“Tan ne’e, espera ba futuru parte relevante sira bele tau ba kurríkulu hodi hanorin estudante sira. Atu nune’e, kompetisaun atletizmu ruma iha, estudante sira bele iha koñesementu hodi kompete,” nia dehan.
Iha fatin hanesan, Koordenadór Atletizmu munisípiu Vikeke, Deonizio da Costa Soares, haktuir desportu atletizmu sai Importante ba estudante sira liuliu ba área edukasuan tanba parte federasaun sei esforsu halo negosiasaun ba ME, nune’e jogu kids atletic bele tau iha kurríkulu edukasaun.
“Durante ne’e, ita haree seidauk implementa iha eskola sira. Tanba, ami-nia federasaun sei esforsu atu hakbesuk ba ME hodi envolve atletizmu ba kurríkylu. Desportu atletizmu ba kurríkulu ne’e, atu mentaliza estudante sira iha ensinu báziku husi idade 08 to’o 12. Tan ne’e, ami husu ME tau desportu atletizmu hodi estudante sira aprende,” nia hateten.
Hatán ba preokupasaun ne’e, reprezentante Servisu Edukasaun munisípiu Vikeke, Emidio Amaral, hateten kona-ba desportu atletizmu iha ona kurríkulu edukasaun iha tiha ona, Ministériu Edukasaun mós distribui materiál atletizmu ba eskola ensinu báziku sira.
“Maibé, ita-nia profesór sira desportu dalaruma hanorin ba estudante sira, balun ladún tau importánsia ba desportu atletizmu. Maibé, ha’u hateten katak ba futuru eskola sira sei implementa kurríkulu atletizmu, ne’ebé mak ministériu antes ne’e tau ona ba kurríkulu. Tanba, desportu atletizmu ne’e di’ak hodi forma estudante sira sai forte liután,” nia dehan.
Jornalista : Vitorino Lopes da Costa
Editór : Cancio Ximenes
