DILI, 02 Maiu 2025 (TATOLI)—Diretór Nasionál Servisu Ospitalár (DNSH-sigla portugés) Ministériu Saúde, Carlos de Carvalho, hateten Governu Timor-Leste liuhusi Ministériu Saúde seidauk halo transferénsia pasiente ba Ospitál Atambua.
Tuir informasaun ne’ebé espalla iha mídia sosiál katak pasiente ida-ne’ebé tara-aan iha Ospitál Atambua ne’e la’ós transfere husi Governu no ne’e nia konsidera informasaun laloos.
“To’o agora ita-nia Governu nunka halo transferénsia pasiente ba Ospitál Atambua. Karik dehan husi Timor-Leste mak bá ne’e parese privadu karik, maibé Governu seidauk haruka pasiente bá Atambua,” Carlos de Carvalho dehan iha nia kna’ar fatin, Kaikoli, sesta ne’e.
Nia haktuir katak durante ne’e Governu só halo transferénsia pasiente bá Jakarta (Indonézia), Malázia no Singapura.
Tuir informasaun husi fonte kredível katak pasiente ida mate tara-aan iha Ospitál Atambua ne’e maihusi Munisípiu Ermera.
Jornalista: Felicidade Ximenes
Editór: Xisto Freitas da Piedade
