DILI, 02 Maiu 2025 (TATOLI)—Prezidente Asosiasaun Parteira Munisípiu Dili, Joaquina Belo, hateten atu selebra Loron Mundiál Parteira, Asosiasaun Parteira Munisípiu Dili (APMD) sei fó konsulta jerál ba komunidade iha Aldeia Terus-Na’in, Suku Vila-Verde, Postu Adminsitrativu Vera-Krúz, Munisípiu Dili.
“Ha’u nu’udár prezidente ba iha Asosiasaun Parteira Munisípiu Dili, hakarak hato’o ami-nia programa ba iha aniversáriu mak dahuluk fahe promosaun saúde bá iha inan isin-rua sira. Daruak, fó treinamentu ba parteira sira no datoluk mak ami sei halo konsulta jerál iha Aldeia Terus-Na’in,” Joaquina Belo informa ba jornalista sira, iha nia kna’ar fatin, sesta ne’e.
Nia dehan, Loron Mundiál Parteira ne’e atividade sei realiza iha loron 5 Maiu, hafoin misa sei kontinua konsulta jerál.
“Ami sei realiza iha loron 5 Maiu. Hafoin misa, ami kontinua halo konsulta jerál, marsa saudável no kompetisaun saudável, liga ba kurasaun saudável ba parteira sentru saúde lima iha Dili inklui Hospital Nacional Guido Valadares (HNGV),” nia relata.
Nia esplika, APMD laiha orsamentu hodi halo programa sira-ne’e, maibé liuhusi kontribuisaun ne’ebé iha, no mós apoiu husi parseiru hanesan Programa Nasaun Unida ba Dezenvolvimentu hodi realiza atividade ida-ne’e.
“Husi selebrasaun Loron Mundiál Parteira ne’e sei fó treinamentu di’ak ba parteira sira oinsá atende komunikasaun di’ak ba pasiente sira bainhira presiza ita-nia tulun, tanba uluk ita rona dehan parteira ne’e komunikasaun ladún di’ak, más agora hahú menus ona tanba ami fó formasaun ba sira,” nia esplika.
Tanba ne’e, Joaquina Belo, hato’o mensajen ba inan-feton sira nafatin hakbesik aan ba sentru saúde ne’ebé mak besik atu konsulta nune’e labele afeta bá bebé ne’ebé mak iha.
Jornalista: Felicidade Ximenes
Editór: Xisto Freitas da Piedade
