SMA Kovalima distribui ona fini hare nakroma ba to’os-na’in
KOVALIMA, 02 Maiu 2025 (TATOLI) – Servisu Munisipál Agrikultura (SMA) Kovalima distribui ona batar noimutin no sele tonelada sanulu ba agrikultór sira ne’ebé mak halai natar, iha postu administrativu tolu ne’ebé mak pertense ba munisípiu Kovalima.
Diretór Servisu Munisipál Agrikultura Kovalima, Lino Magno, informa katak fini hare-kulit distribui de’it ba agrikultór sira Postu administrativu Suai, Timór no ba agrikultór sira iha Zumalai.
“Ita distribui fina hare nakroma ba agrikultór sira maioria ba to’os-na’in sira iha postu administrativu Zumalai tanba agrikultór sira halai natar makaas,tuir Suai no iha Tilomar distribui fini hare-kulit ladun barak tanba natar barak mak abandona iha Tilomar tanba bee la iha”, Lino Magno dehan ba TATOLI,ohin.
Polítika Ministériu Agrikultura Peska, Pekuária no Floresta (MAPPF) kada tinan distribui fini hare-kulit nune’e agrikultór sira kada tinan hasa’e produsaun hare-kulit iha munisípiu Kovalima mínimu hare-kulit tonela 2,5 másimu to’o tonela neen (6).
“Bazeia ba dadus ne’ebé mak ami rekolla kada tinan ita-nia produsaun hare kulit tonela 3,5 ne’e elobora iha relatóriu ba epoka ba dahuluk de’it” , nia dehan.
Dirijente ne’e esplika katak agrikultór sira iha kovalima halai natar ba iha époka ba dahuluk de’it , atu halai natar ba iha segundu époka hasoru problema tanba bee la iha, agrikultór sira nia tempu la sufisisente atu halai natar, okupadu hala’o kulturál no husik animal livre.
“Ho atitude husik animál livre hodi fó impaktu boot ba to’os-na’in no natar-na’in sira no ba Governu atu hasa’e produsaun iha rai-laran maske iha ona lei maibé seidauk implementa nune’e bele halo to’os no natar ho livre la presiza ita halo lutu”, nia fó hanoin.
Aleinde ne’e, diretór Agrikultura mós relata dadus distribuisaun batar noimutin no sele hamutuk tonelada 10. Husi númeru agrikultór Kovalima, distribui fini batar ba to’os-na’in sira husi postu administrativu hitu.
“Polítika distribuisaun batar ami la termina loron , tanba tama sai suku nune’e distribui batar depende volume agrikultór sira kuda batar bainhira iha postu sira menus kuda batar ita distribui bazeia ba ida-ne’e”, nia relata.
Jornalista:Celestina Teles
Editór :Rafael Ximenes de A. Belo
