BOBONARU, 02 Maiu 2025 (TATOLI)—Vise Primeiru-Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, triste haree progresu konstrusaun Uma Dignu hamutuk 25 ne’ebé konstrui husi Empreza Rics Unipessoal, Lda, iha Aldeia Tunubibi, Suku Tapo-Memo, Postu Administrativu Maliana, Munisípiu Bobonaru, finaliza tarde tanba foin atinje de’it pursentu 20.
Vise Primeiru-Ministru ne’e informa, konstrusaun Uma Dignu ne’e tuir polítika IX Governu Konstitusionál, tan ne’e iha tinan ne’e Ministeriu Dezenvolvimentu Rurál no Abitasaun Komunitária harii ona Uma Dignu hamutuk 90 iha munisípiu haat kompostu husi Lautein, Manatutu, Bobonaru no Manufahi.
Tuir kontratu ne’ebé iha, nia esplika, empreza konstrutora sira sei entrega ba Governu obra referida iha Juñu tinan ne’e, maibé konstrusaun iha Tunubibi la hatudu progresu di’ak.
“Entre fatin haat ne’e hotu-hotu iha progresu di’ak. Ida-ne’ebé tarde liu mak iha Bobonaru ne’e. Tanba ne’e mak ha’u fó atensaun másima iha-ne’e,” Assanami hateten ba jornalista sira hafoin halo inspesaun direta ba konstrusaun Uma Dignu, iha Aldeia Tunubibi, sesta ne’e.
Nia haktuir, konstrusaun Uma Dignu hamutuk 90 ne’e hanesan projetu pilotu ida ba munisípiu haat, iha-ne’ebé iha Lautein hamutuk 15, Manatutu 25, Bobonaru 25 no Manufahi hamutuk 25.
Nia hateten, Uma Dignu hamutuk 90 ne’e empreza hahú konstrui iha inísiu fulan-Janeiru tinan ne’e.
Governante ne’e sei konvoka enkontru ho empreza ne’ebé kaer projetu referidu iha Tunubibi hodi buka solusaun, karik problema finanseiru ka problema seluk, maibé saida mak husi traballadór ko’alia, materiál mak la mai lalais.
Assanami informa katak bainhira projetu ne’e empreza la finaliza tuir tempu ne’ebé iha, Governu prolonga tan tempu nune’e empreza bele finaliza.
Iha fatin hanesan, tékniku husi empreza konstrutora, Olandino Santos, hateten durante hahú serbisu hodi konstrui uma ne’e, uma hamutuk 19 mak nia fondasi harii hotu ona, sei hela neen mak seidauk tanba materiál to’o tarde.
Nia dehan, bá-oin empreza no tékniku hamutuk ho traballadór sira sei esforsu hodi finaliza obra tuir kontratu ne’ebé mak determinadu.
Jornalista: Natalino Costa
Editór: Xisto Freitas da Piedade
