DILI, 04 Maiu 2025 (TATOLI)—Prezidente Repúblika (PR), José Ramos Horta, husu atu dezenvolve no moderniza lingua Portugés hanesan dalen tetun, tanba dezenvolvimentu língua portugeza iha Timor-Leste sa’e makaas.
“Língua portugeza iha Timor-Leste dezenvolve maka’as dezde tinan 2000 to’o mai agora, ita haree ema liu 30% mak ko’alia. Uluk nein labarik oan ida ko’alia maibé agora rihun ba rihun iha Timor-Leste bele ko’alia, joven atus ba atus iha universidade ko’alia. Purtantu, atu hametin língua ida la’ós tinan ida tinan 10, ne’e demora. Konforme Governu nia dadus estatístika hatudu liu 30%. Ne’e di’ak tebe-tebes, ne’e aas, ne’e tenke kontinua dezenvolve, moderniza liután sai hanesan língua Tetun no Málaiu,” Xefe Estadu ne’e hatete ba jornalista sira iha Timor Plaza, segunda ne’e.
Língua Portugeza no tetun ne’e língua ofisiál ne’ebé temi ona iha artigu 3 Konstitusaun Repúblika Demokrátika Timor-Leste.
“Língua rua, tetun ho portugés ne’e tenke tane-malu. Ita haree dezenvolvementu tetun tane lian Portugés,” nia dehan.
Xefe Estadu dehan, língua tetun funsiona 100% tanba ema ida-idak ko’alia hakerek konforme mai iha ulun, no neineik tetun sai lingua ida-ne’ebé dinámiku no forte.
“Maibé ha’u mós defende língua málaiu tanba iha ema 40%. Ne’ebé, oinsá hasa’e estatutu língua málaiu iha Timor-Leste no mós língua inglés ne’e importante tebes,” nia hateten.
Jornalista : Osória Marques
Editór : Cancio Ximenes
