DILI, 05 Maiu 2025 (TATOLI)—Diretór Serbisu Apoiu Diagnóstiku no Terapéutiku, Vidal de Jesus Lopes, hateten Dezembru tinan ne’e Empreza China Civil Engineer Construction Cooperation (CCECC) sei entrega konstrusaun pediatria andár lima ho ICCU ba Hospital Nacional Guido Valadares (HNGV).
“Prosesu konstrusaun ba sala pediatria andár lima daudaun ne’e serbisu la’o hela no nia persentajen to’o ona 40-resin no tuir kontratu katak Dezembru sei entrega ba Hospital Nacional Guido Valadares (HNGV) atu utiliza ona,” Vidal de Jesus Lopes, informa ba jornalista sira, iha nia kna’ar fatin, HNGV, Bidau, segunda ne’e.
Nia dehan, tuir verbalmente husi empreza katak sira sei konklui konstrusaun ne’e iha fulan-Dezembru.
“Empreza sira serbisu di’ak hela, tanba loron mós sira serbisu másimu no kalan mós sira kontinua serbisu,” Vidal haktuir.
Nia relata, kama ne’ebé mak sei tau iha sala pediatria andár lima no ICCU ne’e hamutuk 300-resin inklui ho ekipamentu báziku sufistifikadu sira.
“Bainhira edifisiu ne’e prontu ona bele responde ba problema overload ne’ebé mak ita hasoru, tanba rekursu umanu mós agora iha prosesu estudu hela. Banhira edifísiu ne’e prontu bele mai apoiu tan no sei uza mós rekursu umanu agora daudaun ne’ebé mak ita iha,” Vidal informa.
Antes ne’e, Diretora Serbisu Administrasaun Finanseira no Lojístika HNGV, Sara Maria Xavier dehan, kona-ba progresu konstrusaun ba sala pediatria andár lima iha HNGV ne’e tama ona bá 37%.
“Progresu kontrusaun Pediatria andár lima, agora daudaun ninia persentajen atinje ona bá 37% no andár primeiru besik atu konkluidu ona. Ha’u la lembra didi’ak nia progresu konstrusaun nia pursentu hira, maibé iha terenu andár ida hahú ona,” nia haktuir.
Aleinde ne’e, Diretór Empreza China Civil Engineer Construction Cooperation (CCECC), Liang Quing komprometidu katak sei konklui projetu ida-ne’e ho infraestrutura ne’ebé kualidade ba Governu no povu Timor-Leste.
Orsamentu ba konstrusaun pediatria andár lima iha HNGV hamutuk $9.341.663,70.
Jornalista: Felicidade Ximenes
Editór: Xisto Freitas da Piedade
