DILI, 05 Maiu 2025 (TATOLI)-Diretór Eskola Ensinu Sekundáriu Tékniku Vokasionál (ESTV) Bekora, Tomas Pinto, husu ba governu liuhusi Ministériu Edukasaun (ME) atu fasilita kadeira no meza ba komputadór, maibé governu hatán sei sosa fazeadamente.
“Ami presiza kadeira no meza ba tau komputadór nian, husu mós komputadór ne’ebé kada departamentu ida hetan 30, entaun departamentu haat ita presiza 120”, dehan nia ba TATOLI iha nia knaar fatin Bekora, segunda ne’e.
Nia dehan komputadór ne’ebé funsiona mak iha departementu arte gráfika 35, departementu informátika iha 18, departementu eletrisidade seidauk iha (zero), no elektróniku nian iha neen.
“Kona-ba departamentu eletrisidade komputadór zero, tanba durante ne’e manorin fó de’it teória depois ligadu ho prátika direitamente no planu agora ne’e monta aplikasaun eletrisidade nian, maibé seidauk tanba ami-nia komputadór mak laiha. Durante ne’e teória no prátika diretamente liuhusi komputasaun nian”, nia dehan.
“Mesmu Edukasaun hatán ona ami-nia pedidu katak sira prepara uluk komputadór 20, maibé ida-ne’e nafatin la to’o. Ami esforsu halo proposta ba parseiru dezenvolvementu sira hanesan iha nasaun seluk, ezemplu embaixada sira iha Timor-Leste”, nia tenik.
Totál manorin ativu iha eskola ESTV 28 Novembru hamutuk na’in 43, na’in tolu moras, ida kontinua estudu mestradu nian iha rai li’ur, na’in tolu tama iha kargu xefia. Enkuantu totál estudante hamutuk 410.
Hatán ba pedidu fasilidade eskola, Diretór Nasionál Ensinu Sekundáriu Jerál (ESTV), Benjamin Fernandes, hatete eskola lima ne’ebé sei hetan komputadór mak hanesan ESTV 28 Novembru Bekora, Eskola Sekundária Téknica Vokasionál-Grupu Teknologia no Indústria (ESTV-GTI) Bekora, inklui ESTV Maliana, Ermera no Baukau.
“Eskola ESTV seluk mós sei sosa, maibé sosa fazeadamente, ne’ebé tinan oin ne’e ita oferese uluk ba eskola lima”, akresenta.
ME aloka orsamentu $175.000 ba akizisaun komputadór 175, ne’ebé kada unidade ho kustu $1.000.
Notísia relevante: ME distribui ona materiál prátika ba Eskola ESTV 28 Novembru
Jornalista : Osória Marques
Editora : Rita Almeida
