DILI, 05 Maiu 2025 (TATOLI)—Juiza dezembargadora ida husi iha Tribunál Rekursu, Maria Natércia G. Ferreira, hato’o pedidu providénsia kautelár bá Tribunál Dili kontesta desizaun Prezidente Repúblika (PR), José Ramos Horta, hodi nomea Prezidente Tribunál Rekursu (PTR), Afonso Carmona, foin daudaun ne’e.
Tuir Natércia katak nomeasaun ne’e la bazeia ba Konstitusaun no lei ne’ebé vigór, tanba ne’e, iha sesta (02/5), Juiza Dezembargadora iha Tribunál Tribunál Rekursu ne’e hasai mandadu sitasaun ho NUC 0110/25.CVTDD ho Providénsia Kautelár hodi Prezidente Repúblika, José Ramos Horta, atu hatán ba nomeasaun Prezidente Tribunál Rekursu foun.
Nune’e, Juiza Dezembargadora hasai sitasaun Providénsia Kautelár ne’ebé mak juiza hodi hatama bá Tribunál Judisiál Primeira Instánsia Dili hodi husu Xefe Estadu José Ramos Horta atu hatán sitasaun referida iha prazu loron sanulu (10) nia laran.
Iha mandadu sitasaun ne’e mós Juiza Dezembargadora Tribunál Rekursu ne’e husu ba Xefe Estadu atu hili nia mandatáriu ida hodi bele kontesta sitasaun Providénsia Kautelár ne’e.
“Sita ema ne’ebé identifika hela iha kraik ne’ebá atu iha loron 10 nia laran, hakarak karik kontesta asaun, se lae sei konsidera konfesadu faktu sira-ne’ebé autór alega,” sita husi komunikadu ne’ebé Tatoli asesu, segunda ne’e.
Iha sorin seluk, Jurista Sergio Quintas hateten, Providénsia Kautelár inominada ne’ebé Juiza Natércia hatama iha Tribunál Primeira Instánsia Dili, nu’udár prosesu ne’ebé parte ida hatama iha Tribunál molok asaun prinsipál, kuandu asaun ne’e la’o daudaun.
Notísia relevante: PR Horta nomea Juíz Afonso Carmona asumi kargu Prezidente Tribunál Rekursu
“Ne’ebé, tuir ita-nia Konstituisaun artigu 26, kualker sidadaun bele hatama asaun iha Tribunál hodi defende sira-nia direitu no interese. Bainhira Tribunál simu Petisaun Inisiál ne’ebé rekerente (Juíza Natércia) hatama, Tribunál mós sei notifika parte kontráriu atu dedús opozisaun. Agora, Prezidente Repúblika hanesan rekeridu nian iha direitu hodi responde Petisaun Inisiál ne’e. Karik PR la responde Petisaun Inisiál ne’e, mak sai problema ba Prezidente Repúblika rasik no konsidera rekeridu konfesadu ba faktu sira-ne’ebé autór artikula tuir artigu 364 husi Kodigu Prosesu Sivíl,” Sergio ba Tatoli via watshApp, Domingu (04/05).
Nia esplika, Xefe Estadu tuir artigu 366 númeru 1 husi Kodigu Prosesu Sivíl, iha prazu loron 30 atu kontesta petisaun ka sitasaun ba Providénsia Kautelár ne’ebé Juiza Konsilleira iha Tribunál Rekursu, Maria Natércia, hatama ona bá Tribunál Judisiál Primeira Instánsia Dili no prosesu ne’e bá iha rekursu kontensiozu prazu loron 10 nia laran Xefe Estadu liuhusi nia mandatáriu tenke responde.
Rekorda fali katak Xefe Estadu José Ramos Horta nomea no fó ona pose ba Prezidente Tribunál Rekursu foun, Afonso Carmona, iha loron 29 Abríl 2025.
Xefe Estadu nia nomeasaun ne’e bazeia Artigu 86 Konstituisaun RDTL konjuga ho númeru 3 iha Artigu 124 hodi fó kompeténsia ba PR atu nomea entre Juíz no Prezidente Supremu Tribunál Justisa. Ho nune’e mak PR uza nia kompeténsia nomea PTR Afonso Carmona hodi troka Prezidente Tribunál Rekursu sesante, Deolindo dos Santos.
Jornalista: Natalino Costa
Editór: Xisto Freitas da Piedade
