DILI, 05 Maiu 2025 (TATOLI)—Diretór Servisu Apoiu Diagnóstiku no Terapéutiku, Vidal de Jesus Lopes, informa Hospital Nacional Guido Valadares (HNGV) tempu badak sei asina nota entendimentu (MoU) ho Banku Nasionál Komérsiu Timor-Leste (BNCTL-sigla portugés), atu estabelese banku ida iha HNGV, nune’e pagamentu saida de’it mak iha tenke liuhusi sistema dijitál.
“Ami halo hela koordenasaun ho BNCTL atu asina MoU, tanba foin lalais sira mai ami hatudu ona fatin hodi estabelese banku ida iha-ne’e atubele halo pagamentu saida de’it mak iha HNGV tenke selu liuhusi sistema dijitál, nune’e bele hamenus mál administrasaun sira,” Vidal de Jesus Lopes, dehan iha nia kna’ar fatin, segunda ne’e.
Nia haktuir, antes ne’e, regra sira-ne’e estabelesida ona, maibé pagamentu ne’e uza manuál de’it, tanba ne’e agora tenke uza fali dijitál hodi tuir sistema.
Antes ne’e, informasaun ne’ebé mak espallada iha mídia sosiál katak atestadu médiku ne’ebé mak halo iha Hospital Nacional Guido Valadares akontese mál administrasaun, nune’e HNGV buka solusaun atu halo pagamentu liuhusi sistema dijitál.
Jornalista: Felicidade Ximenes
Editór: Xisto Freitas da Piedade
