VIKEKE, 05 Maiu 2025 (TATOLI)—Akontesementu udan-boot afeta ba estrada Liasidi, suku Babulu, postu administrativu Uatulari, munisípiu Vikeke kotu hodi difikulda ba komunidade iha área rurál.
Xefe suku Matahoi, Antonio Amaral, haktuir dalan laiha ba aldeia Iraler, suku Matahoi foin lalais udan-boot halo rai-monu hodi afeta ba estrada monu ne’e agora daudaun atu ba Iraler labele, difikulta ba komunidade nomós difikulta ba dezenvolvimentu sira iha aldeia.
“Dalan ne’e kotu akontese udan boot ne’ebé akontese iha loron 01 Maiu 2025 estraga estrada iha área Liasidi, Ou-onokai. Estrada ne’e komunidade iha postu Uatulari maioria mak asesu mak hanesan Babulo, Afaloikai, Matahoi, Kelikai, Babulo-Bagia, bele asesu ba Baukau no Lautein sai dalan alternativu. Maibé, agora kotu, entaun ami ba aldeia Ireler sai difikuldade ba ami,” Antonio Amaral hateten ba TATOLI, iha postu Uatulari, ohin.
Xefe suku Matahoi hatutan, sai difikuldade ba komunidade nia atividade negósiu, estudante no profesór, pesoál saúde servisu iha Postu Saúde ne’ebé lokaliza iha Nunumalau no Iraler, nomós ba empreza ne’ebé agora halo reabilitasaun Estrada dirasaun Nunumalau-Iralere labele halo mobilizasaun materiál ba fatin serbisu.
“Ha’u sente estrada ne’e difikulta ba komunidade no dezenvolvimentu sira iha área ne’ebá. Daudaun ne’e karreta sira faan nesesidade báziku mós labele asesu. Tan ne’e, ami husu ba Ministériu Obra Públiku (MOP) hodi hadi’a estrada referidade, atu labele difikulta ba ita-nia komunidade sira hela iha área rural,” nia dehan.
Hatán ba preokupasaun ne’e, Diretór Servisu Obra Públika Munisípiu Vikeke (SOPMV) , Casildo Gomes Soares, haktuir kona-ba dalan Liasidi ne’e iha tempu badak SMOP sei halo koordena ho empreza sira hodi halo normaliza emerjénsia atu komunidade asesu.
“Dalan Lasidi ne’ebé monu ne’e, antes ne’e Empreza Bere Is Baec mak halo normalizasaun, maibé impaktu husi udan halo rai monu. Nune’e, ita sei buka meu hodi normalliza dalan Liasidi ne’ebé kotu, iha tempu besik nin laran. Ida-ne’e mak ita esforsu hela hodi hlo normaliza ba dalan referida,” nia hateten.
Jornalista : Vitorino Lopes da Costa
Editór : Cancio Ximenes
